Kular ki Kompani ban shna pyndep mynta u snem ia ka Surok 4 Lane

U Symbud Myntri Rangbah ka jylla uba khmih ia ka tnad PWD (R&B) hynne ka sngi ula lum ia ka jingialang bad ki heh ophisar halor ka jinglong jingman ha kaba iadei bad ka jingshna ia ka surok Shillong-Dawki Road bad la iengskhem ha ka nongrim ba dei ban pyndep noh ia kane ka projek hapoh u Nohprah 2026. Ha kane ka jingialang kaba la lum da u Symbud Myntri Rangbah ka jylla hapoh ka ophis treikam ha Secretariat la wan ban iashimbynta da ki heh bad ki nongmihkhmat na ka NHIDCL, tnad PWD, ki heh ophisar ka sorkar jylla, ki heh pulit bad ki nongmihkhmat na ki kompani kiba shna ia ka surok na Shillong sha Dawki kaba la dei ka projek kaba la bei tyngka da ka JICA. Haba iakren bad ki nongpathai khubor hadien ba la wai ka jingialang, u Bah Prestone Tynsong ula ong ba ula lum ia ka jingialang ban pynkhreh ia ka plan ne ka rukom treikam namar ba kala wan ka aiom ban rang noh bad ki kompani ki lah ban treikam pura noh ia ka kam.

“Ki kompani kin phah ia ka ‘Working Plan’ ia ka rukom pynkhreh ban pyntrei ia ka kam, khnang ba kin lah ban pynsted ia ka kam bad ba kan ym thud ka leit ka wan. Ngi lah iakren bad mynta kan shong ha ki kompani ba kin ai ia ka kaiphod la ki kwah ban trei mynmiet ne mynsngi bad kaei kaba long kabab ha tam bad kaba shngain ia ki nongtrei bad ia ki paidbah ruh” ong u Bah Prestone bad ka bynrpa ba la bthah ba kin leit ban sorjamin khnang ba yn lah ban pyndep ia kane ka surok ha ka por kaba la buh ia kane ka projek kaba kongsan bha. U Bah Prestone ula ong, ba ka NHIDCL kala ai ia ka jingkular ba mar ia sangeh u slap bad wan ka aiom rkhiang kumta kin treikam pura noh ban pyndep ia kane ka projek ha ka por kaba la buh kaba kynthup ia ka Package 1, 4 bad 5. Ha kaba iadei bad ka jingkynnoh ki paidbah ba ka jingshna ia kane ka surok kala slem shaba palat, u Bah Prestone ula pynshai ba ki paidbah kila shim beit naduh ka por ba pyntrei ki kompani kiba mynshwa namar ka don ka jingshisha ba ki wan trei da kiwei ki kompani ia ka package 1,2,4 bad 5 bad ka rukom treikam ka jongki kadei kaba ka sorkar kam hun hi ruh bad khatduh ka NHIDCL kala pynkut noh ia kane ka jingiateh kular ia ka kontrak bad ki kompani bapher bapher.

“Hadien ba kila ioh noh da ki kompani kiba thymmai naduh ka package 1,2,4 bad 5 ngi iohi ba ki kam ki jam kila iaid beit. Lada nga kren ia ka jingshisha ba ki paidbah ki ong ba ka slem kadei na ka daw jong ka kompani kaba mynshwa kaba trei nyngkong ia kitei ki package kiba khlem trei bha bad kim kot bor ruh ban trei ia kine ki jait projek kiba heh bad kiba kham jynjar hapoh ka jylla Meghalaya ka jong ngi. Ia kaba mynta hi, hadien ba NHIDCL kala pynkhamti noh sha kiwei pat ki kompani ka rukom treikam ka paw ba ka i biang” la ong u Bah Prestone. U Symbud Myntri Rangbah ula pynthikna da kaba ong, “Ia ka Package 1, 2, 4 bad 5 kidei ban pyndep ha u Nohprah 2026 bad kila ai da ka jingthoh ba ia ka Package 1 ban tei ia ka surok 4 Lane un pyndep hapoh u Nohprah mynta u snem”.