Kular u MR ban pynïoh madan paka ïa ka Umsning Patarim

U Myntri Rangbah ka jylla u Conrad K. Sangma, mynta ka sngi u la hiar ban iuhkjat dalade ha Madan Umsning Sports & Cultural Club (US&CC) kaba don ha Umsning Patarim, ban sngap ïaki jingud jingnam jong ki Nongshong Shnong lyngba ka sports Club halor ka jingdonkam jong ki ba ki la donkam eh  ban ioh noh ïaka madan kaba paka ha katei ka Madan Umsning Patarim.Naka liang ki Nongialam ka Umsning Sports & Cultural Club (US&CC) lyngba u President ka jong ka u bah Rostarson Kylla, ki la Pynpaw ba naka liang ka sports club ka la ju leit ud leit nam sha ka sorkar lyngba ka tnad ki kam ialehkai ban ïarap ban pynioh noh daka madan ïalehkai kaba paka hakaba ki la don ruh ki jing kular ban pynioh iaki lad jingiaram hynrei haduh mynta kam pat shym la don kano kano ka jingiarap kaba kin ioh naka bynta katei ka Madan.

Haba kren naka liang u Myntri Rangbah Ka Jylla U Conrad Sangma u la ai syndon ka jingkular ba un shimkhia hi dalade, na bynta ban pynbha ia katei ka madan, da kaba ong ruh ba ka dei ka madan kaba donkam shisha ban pynbha ha kiba bun ki liang hakaba yn pyrshang ban sdang shwa dakaba pyndep ïaka jingker jingda, Ka VIP Galary bad ka jingpynbha ïaka madan bad u la kular ruh ba un sa shimkhia hi dalade ban Pynurlong ia kane ka jingangnud jong ki. Ha katei ka sngi ka jingleit peit u Conrad K. Sangma, ïaka jingdonkam ka Madan ïalehkai, la sakhi da ka jingdonlang u Bah Sosthenes Sohtun, Myntri Sorkar jylla, u Dr. Celestine Lyngdoh, MLA Umsning, u Damanbait Lamare, MLA Umroi, u Bah Charles Marngar, MLA Mawhati, ka Kong Rona Khymdeit, MDC Nongpoh, ki ophisar sorkar, ki nongialam ka Club kiba kynthup ia u bah Eric Benjamin Mawlong kum u secretary lem bad ki Nongialam ka thaiñ Umsning.

Haba kren ha katei ka sngi, ha ka jingkren u Bah Sosthenes Sohtun bad u Dr. Celestine Lyngdoh, ki la kubur ia ka jingdonkam ban pynbha ia ka Madan ha Umsning Patarim, ha kaba pynskhem ia ka jingangnud da ki nongialam ka US&CC, ba katei ka madan ka dei ban long kaba paka, khnang ba kan long kaba myntoi ia ki khun samla bad khamtam eh ba katei ka madan, ka dei ka madan kaba ju pynlong ia ki lympung ialehkai bapher bapher.