Kular u Myntri sorkat pdeng ban shna shuh ki surokbah ha Jylla

U Symbud Myntri Rangbah ka jylla uba khmih ia ka tand PWD (Roads) u Bah Prestone Tynsong hynne ka sngi ula ong ba u Myntri ka Sorkar Pdeng uba khmih ia ka Ministry of Roads, Transport and Highway u Nitin Gadkari ula kular ban shimkhia ia ki jingkyrpad ka sorkar ban shna ia kiba bun ki surok hapoh Meghalaya.Ha ka sngi Baar, u Myntri Rangbah ka jylla u Conrad Sangma bad u Bah Prestone Tynsong ki la leit iakynduh ia u Nitin Gadkari ha New Delhi ban kyrpad ban shna shuh shuh ia ki surok kiba kongsan hapoh ka jylla Meghalaya.“Ngi lah don ia ka jingialang bad u Nitin Gadkari, ngi lah iakren nyngkong eh halor ka projek jong ka SARDP. Ha kane ka jylla ka jong ngi kaba sahteng kadei sa tang artylli, kawei kadei ka surok kaba na Nongstoin sha Wahkaji kaban mih sha Phlangdiloin ban pyniasoh bad ka Ranikor bad ka surok ka baar kadei na Nongstoin sha Rambrai bad na Rambrai kan mih sha Kyrshai ban pyniasoh bad ka Chegaon ka Assam. Ia ka wat kaba nyngkong lah dep ban pyndep hynrei na ka bynta ka wat ka baar la pynduh noh ia ka SARDP bad hadien ba la pynduh noh, kumta hynnin ka sngi ngi lah kyrpad ia u Myntri ka Sorkar India ban sngewbha ban pdiang lem ia ka jingkyrpad da kaba pyniaid noh lyngba kano kano ka skhim khnang ba ngin lah ban pyndep noh ia kane ka wat ka baar kaban ai jingmyntoi ia ki paidbah” la ong u Bah Prestone haba batai shaphang ka jingleit ia kynduh ia u Nitin Gadkari.

U Bah Prestone ula ong, ba u Nitin Gadkari ula kular ban wad ia ki lad ki lynti ban pynioh ia ka skhim kaba kyrpang ban pyndep ia kine ki ar tylli ki projek kiba kongsan na ka bynta ka jylla Meghalaya baroh kawei.“Ngi lah iakren ruh ha kaba ia dei bad ka High Speed Corridor, ha kaba u Myntri ka Sorkar India ula bthah ia ngi ba ngi dei ban pynkloi noh ia ka jingleh sorjamin khnang ba yn ioh ban shna pyndep noh ia ka DPR, khnang ba yn ioh ban khot Tender ban ban ioh sdang noh ia kane ka surok kaban pynsuk ia ka leit ka wan ki paidbah ka jylla Meghalaya bad Assam” ong u Bah Prestone bad ka iathuh ba kane ka surok kan poi shaduh Silchar Assam, Tripura bad Mizoram.

U la iathuh, ba ki lah iakren ruh ha kaba ia dei bad ka surok kaba don hajan ka ICAR, namar ba ka jaka khyndiat ki hap ha ka Botanical Survey of India (BSI) bad Indian Oil Corporation kaba dang shna ia ka Bottling Plant, na ka liang u Secretary ka MoRTH un sa lum ia ka jingialang ba kyrpang bad ka BSI bad IOC kumno ban pynbeit ia katei ka kam.U Symbud Myntri Rangbah ula ong, ba kila iakren ruh ha kaba iadei bad ka jingshna ia ka jingkieng Brahmaputra kaban pyniasoh bad ka Phulbari, kane ka surok kadei ka 4 Lane kaba pyniasoh iaka West Bengal bad ki jaka rithor ha Garo Hills bad kila kyrpad ba ia ka surok ha ka thain Phulbari ruh dei ban shna noh kum ka Four Lane kaban kut haduh Agayak aba don kumba 56-60 Km.“U Nitin Gadkari ula bthah ia u Secretary ka MoRTH bad ia ki heh ophisar ba kin peit bad khmih bniah ia kane ka jingtyrwa ban shna ia ka 4 Lane” la iathuh u Bah Prestone.U la ong ba kila iakren ruh ha kaba iadei bad ka jingshna ia ka Flyover kaba dei ban kut ha Anjalee Point bad la kyrpad ban shna haduh Barik Point bad na ka liang u Myntri ka Sorkar Pdeng ula mynjur ba ia kane ka Flyover dei ban shna haduh Barik Point bad ula bthah ia ki ophisar ka NHIDCL bad ia ka Ministry ba kin pynsted katba lah ban shimkhia noh mardor ia kane ka mat namar kiba bun ki jaka kidei kiba hap ha ka Defence Land ban kin ialeh ban pynbeit kloi noh ia kane ka mat.