Kut ka Seng Kyrsiew ka Seng Khasi Nongthymmai ha ka jingshongkun

Ka Seng Khasi Nongthymmai Madanryting Pyllun (SKNMP) hynnin ka sngi, ka la pynlong ia ka Seng Kyrsiew 2024, ia kaba la pynlong ha Madan Nonglum, Mawlynrei, Shillong. Ha shwa ban sdang ka Seng kyrsiew, u President Rangbah ka SKNMP u Rgh Kworshon Marbaniang ula kyntiew ia ka lama bad u la ai ia ka nguh ka dem bad hadien kane ka la don pat ka jingiaid lang sha madan Nonglum, Mawlynrei. Ha kane ka sngi ka seng kyrsiew, ka la sam ruh ia ki khusnam Tyngshain Phyrnai Academic Award sha ki khun samla ka SKNMP kiba la lah ban pass bha shakhmat ha ki kyrdan pule bapher bapher ki jong ki.

La pynshongkun ia kane ka sngi da ki jingrwai, ki jingshad tynrai bad ki jingkren na ki katto katne ngut ki riew Rangbah jong ka seng kyrsiew kiba kynthup na u President ka Seng Khasi Kmie u Rgh O. Pyngrope,  u Rgh Pynshailang Marbanaing ka SKNMP, nalor kiwei de.

Nalor kine ki riew Rangbah na ka seng, la donlang ruh ki riew pawkhmat kiba kynthup ka Dr M. Ampareen Lyngdoh myntri ka sorkar jylla, u Chief Executive Member ka KHADC u bah Pyniaid Singh Syiem, u MLA ka Mawryngkneng u bah Heavingstone Kharpran, u President bad General Secretary Seng Khasi Kmie, Rgh O. Pyngrope bad Rgh Hainess Marbaniang, u Syiem ka Hima Mylliem Pa’iem Ainam Manik Syiem, Syiem Khynnah ka Hima Khyrim, Pa’iem Habapan Syiem, Syiem Khynnah ka Hima Sohra, President ka Seng Khihlang Rgh H. R Kurbah nalor kiwei kiwei pat.