Kwah ka Estimates Committee ka ïing dorbar ban pyndep noh ia ki Model Residential skul

Ka Estimates Committee ka ïing dorbar thawaiñ ka jylla hynne ka sngi ka la shong pyrkhat halor ka jingpyntreikam ia ki projek da ki tnad sorkar bapher bapher. Ka Committee hapoh ka jingialam u Chairman Bah Mayralborn Syiem ryngkat ki dkhot ba dei ki MLA kynthup u Bah Renikton Lyngdoh Tongkhar, Bah Adelbert Nongrum, u Remington Gabil Momin, Bah Wailadmiki Shylla bad ka Miani D Shira bad ki ophisar ka Meghalaya Assembly Secretariat bad ki tnad bapher bapher. Ka jingthmu ka jingialang ka long ban khmih bniah ia ka jingiaid shakhmat ki kam ba ia dei bad ka tnad Pule puthi, ka koit ka khiah, Public Health Engineering (PHE) bad ka tnad Community & Rural Development (C&RD). Ka Committee ka la pynpaw ia ka jingpyniaid shakhmat ki 3 tylli ki Block Institutes of Teacher Education (BITE) bad ki Residential School bad ka la kyntu ia ka tnad pule puthi ban pyndep kloi bad ban pyntreikam noh ia ki Eklavya Model Residential Schools (EMRS) ha Ri-Bhoi bad ha East Garo Hills hapoh u 2025.

Ka Committee ka la ban jur ba donkam pyntreikam bha ia ka Jal Jeevan Mission (JJM) ha ki thaiñ khappud bad la bthah ia ka tnad ban shimkhia ia ki lad ban pynkloi ia ka kam bad ban ai ti ia ka kaiphod ba pura. Kumjuh halor ka jingpyniaid shakhmat ia ka Maternal and Child Health (MCH) hospital ba thymmai ha Nongstoin bad Umsning ha kaba la buh ia ka thong ban sdang pyntreikam noh hapoh u snem 2025. Ka la kyntu ruh ba dei ban shimkhia mardor ban kyntiew ia ki jingdonkam ha ki Civil Hospital, Primary Health Centres (PHC) bad Community Health Centres (CHC).

Ka Committee ka la khmih bniah ia ka jingtei thymmai ia ka Block Development Officer (BDO) bad la shim ia ki jingtip ba ki kam ki la iaid shakhmat  haduh 70-80% bad ka la kyntu ia ka tnad ban pyndep ia ka projek hapoh ka por ban kyntiew ia ka jingshakri sha ki paidbah lyngba ki C&RD Block. U Bah Mayralborn Syiem ula pynpaw ia ka jingsngewhun ha kaba iadei bad ka jingiaid shakhmat jong kitei ki projek baroh bad ula pynpaw ia ka jingkhmih lynti ban dei ban iohi ba dei ban pyntreikam thikna halor ki mat kiba kila iatai sani bha.