Kwah u Myntri Rangbah ban pynsted jingtian bishar halor ka jingshah pynïap u Raja

U Myntri Rangbah ka Jylla u Conrad K Sangma ula kular ban phah pynsted ia ka jingtian bishar pyrshah ia ka Sonam Raghuvanshi, kaba la suba jur ba ka dei kaba la phah pyniap iala u kurim u Raja Raghuvanshi ha Sohra ryngkat bad ia ki 4 ngut ki riewsniew kiba la donkti lang ha katei ka kam pyniap briew.
U Conrad ula pynpaw ba u kwah ba dei ban pyndep kloi ia ka jingtian bishar bad ka sorkar ruh ka long kaba kloi ban shim ia kano kano ka sienjam kaba donkam bad kan pyrshang ban pyniaid sted ia ka mukotduma halor katei ka jingjia kaba la jia ha Sohra.
Ha kawei pat ka liang u Conrad Sangma ula pynpaw ia ka jingsngewsih ba katto katne ki lad pathai khubor ki la pynkylla khongpong ia katei ka jingjia bad pyrshang ban kynnoh kylla ia ki nongshong shnong bad ia ka jylla Meghalaya hynrei mynta ki jingshisha halor katei ka kam pyniap kila mih lut bad kumno kala jia.
Ula ong, ba ki nongshong shnong ka Meghalaya bad ki nongshong shnong ka thain Shatei Lam Mihngi kidei ki briew kiba long paralok bad baroh, kiba shim ruh ia ki nongwan jngohkai kum ki bahaiing hasem bad ki burom bad kitkhia bha ia ki hynrei ka long pat kaba sngewsih ba katto katne ki lad pathai khubor ki pyrshang ban pyni ia kane ha ka lynti ka bym dei.
U Myntri Rangbah ula ai khublei ruh ia ki Pulit ka Meghalaya ba kila lah ban sei ia ki jingshisha hapoh ka por ba lyngkot eh bad kila iaid jar jar ban pynlong ia ka jingtohkit bad ula ong ba u sngewkmen ba ki lah pat ban pynpoi sha kaba kut ia kane ka jingjia.