Kylla khlaw ki jaka jngohkai ha shnong Umdiengpoh

Ha shnong Umdiengpoh ki don bun ki jaka jngohkai kiban khring ia ki nongwankai tangba hynrei kine ki dang sop niut, ki dang long khlaw namar bym pat lah ban pynitynnad bha ia ki. Ha ka jingshisha ka shnong ka la pyrshang ban shna lynti da ka bor jongka hynrei namar ba duna ka jingkyrshan na ka sorkar, kam shym la long kaba paka. Ka shnong Umdiengpoh ka don 90 tylli eiei ki tnum ïing bad kumba 300 ngut eiei ki nongshong shnong. Ha kane ka shnong, ki don ki skul 2 tylli kynthup ka skul Ram Krishna Mission kaba la kham paw bha. Ki kam ba kongsan jong ki briew ka dei ka rep ka riang kum phan, kubi, motor, bad kiwei ki mar rep, bad kim pat ioh jingmyntoi bha na ka kam jngohkai watla ka dei ka shnong kaba don ha lynti bah sha Sohra kaba pawnam tam ha ka kam jngohkai ha ka pyrthei. Ki jaka jngohkai kiba don ha kane ka shnong ki long ka Kshaid Khilon, ka Synranglieh kaban iohi shynna sha them, ki krem, bad kiwei.

Ka jingplie ia ka iew rud surok ne ka lay by market ha shnong Umdiengpoh, ha surokbah Shillong-Sohra, kam shym la wanrah jingmyntoi than ia ki nongshong dukan namar ba ym don nongthied nongpet.Ha kane ka iew la don 22 tylli eiei ki dukan ha kaba la plie paidbah da u MLA ka Sohra u bah Gavin M Mylliem ha ka 25 tarik Risaw 2022 kaba la mang na ka skhim PMKKKY bad CMSDF ha ka jinglut kaba T.69,56,200. Hynrei watla ka la iaid sha ka ar snem eiei mynta hynrei ka iew ka pjah slam slam bad la jan baroh ki dukan kila khang lut. Katkum ka jingiakren bad u Rangbah Shnong ka Umdiengpoh u bah Maurice Dohling, ka daw kaba kongsan kaba la pyllong ia ki dukan ban khang ka dei na ka jingbym don ki nongwan thied wan pet, bad ka daw halor kane ka jingbym don ki nongthied nongpet, ka dei namar ba ka rukom shna ia ka iew kam iahap satia ha kaba kam don satia ka jaka ieng kali bad kane ka la pynngiah ia ki nongleit nongwan ban ieng ban wan thied ia ki mar ki mata ne ban dih bam ja ha katei ka jaka.

U bah Maurice ula ong ba ha ka jingshisha ka shnong ka la kyrpad ia ka tnad PWD, ia ki nongmihkhmat ban shna ia ka jaka ieng kali ha ka jaka kaba ker kynroh hynrei kim shym la urlong satia. Ha ka jingshisha, ka shnong ka la don ka jingthmu ban pynbha ia ki jaka jngohkai sawdong ka shnong hynrei ka la shem jingeh na ka jingbym ioh ia ka jingkyrshan na ka sorkar.