Kylla ktem Awria ki iing ba duk ba shna ka sorkar ha Umbuda

Ka jaka kaba don ia ka jingheh kumba 8 acer tam ba la ai sngewbha da ka Shnong Umbuda sha ka sorkar na ka bynta ban wan rah ia ki kam pynroi ban tei ia ki iing ba duk lyngba ka skim Integrated Housing Slum Development Project lyngba ka sorkar pdeng ka la kylla long pynban kawei na ka jingduhnong ba khraw bad pynsyrwa kai ia ka pisa na ka daw ba kitei ki iing ki la kylla ki ktem awria bad ki kam sniew.Ban pynurlong pat ia katei ka kam kaba la sahteng, na ka liang u MLA ka Nongpoh u Bah Mayralborn Syiem ha ka jingiasynran lang u Bah CB Syiem Rangbah Shnong Umbuda ki la leit ban jurip ia katei ka jaka bad ban iohi da la ki khmat ia ka jinglong jingman jong katei ka Project kaba la sdang sdang naduh u snem 2011. Haba kren sha ki lad pathai khubor, U MLA ka Nongpoh u Bah Mayralborn Syiem u la ong, kane ka skim shna iing ba duk ka dei ka skim kaba wan na ka Sorkar pdeng lyngba ka Integrated Housing Slum Development Project ban wan rah iaki Longiing kiba duk ban sah ha kane ka jaka hynrei ha kane ka jingjurip la lap pynban ba ki iing ki la sdang ban jot bad ki sañium ki la tap lut iaka lynti iaid bad iaki iing, kaba la ailad pat iaki riew shim kabu ban leh ia ki kam sniew kiba bun jait kiba ktah pat iaka imlang ka sahlang.

U la ong ruh, ïa kane ka skim la pynmang kyrpang na ka bynta ban pynioh ïa ka jaka sah ia ki Longiing kiba duk. Ïa ka wat kaba nyngkong la lah ban pyndep hynrei na ka daw ka jingbym ioh ïa ka mang tyngka na ka sorkar pdeng ka Sorkar Jylla ka la hap ban bei pisa khnang ban lah ban pyndep ïa kiba dang sah bad na ki daw kiba bun ba kane ka kam ka la pynsah teng bad haduh mynta ym pat lah ban aiti noh ia ka ki iing sha ki Longiing kiba duk. U Bah Mayralborn ula ong, na ka liang jong u, un sa pynbeit ban iakynduh bad ki Ophisar jong ka Urban lem bad kiwei kiwei kiba dei peit  ban wat bniah ia ka daw kaba pynsah teng ia kane ka kam, bad ban shimkhia ruh ban pyndep noh iaki kam kiba ba dang sah khnang ba yn lah ban aiti noh ia kine ki iing sha kiba dei ban ioh.

U Rangbah Shnong ka Umbuda u bah Cleophas Syiem u la pynpaw ia ka jingbitar halor ka jingieh beiñ ka sorkar ia katei ka kam kaba la sah teng haduh mynta, ula iathuh ba ïa katei ka skim la sdang ban pyntrei naduh u snem 2011 da ka jingthmu ban pynïoh jaka sah na ka bynta ki Longiing ba duk ba rangli ki bym don ia ka iing ban sah bad la lah ban pyndep ïa ka wat ba nyngkong ha u snem 2014 bad haduh mynta ym pat lah ban ai ïa ka bynta sha ki Longiing kiba duk bad phewse mynta ka la Kylla long pynban ka ïingjah bad ka jaka ïaleh ïaki kam jakhlia kiba lai phew jait na ka daw ba ym pat lah ban pyndep pura ia ka ban aiti sha ki Longiing kiba dei hok ban ioh. U la ong ruh, na ka liang ka Shnong ka la dep ban ai sngewbha ka jaka na bynta ban ioh jingmyntoi kiba duk hynrei lada ka Sorkar kam shimkhia ban aiti noh ia kine ki iing sha kiba dei hok ban ioh, na ka liang ka Shnong kan ap haduh u snem thymmai bad lada kane ka jingthmu kam urlong, kam banse ban tuklar noh ia kane ka kam bad kan sa leh da ki kam kiba kham tyngeh ban wanrah noh ia ki Longiing kiba dei hok ban ioh ban shong ban sah ha kitei ki iing.