Kyndit ka AICC ba rem kput ka Congress ha ka ilekshon MDC

Ka jingshah rem kput ka Congress ha ka ilekshon District Council kaba dang shu dep shen, ka la pynkyndit ia ki nongialam ka All India Congress Committee (AICC) na Delhi namar ba ki ju shim ba ka Congress ka dei ka ktem kaba khlaiñ ha Meghalaya.
Ka Congress ka la iaid thylli ha ka ilekshon sha ka KHADC katba ha JHADC ka jop tang 3 ngut, kaba la long u dak ka jingma ia kane ka seng barim tam ha India, kaba la nang hiar ha kane ka jylla.
U Nongialam ka Congress na Meghalaya u bah Ronnie. V. Lyngdoh ula iathuh ba ka Congress kan sa shong jingialang bad ki heh ka All India Congress Committee (AICC) ha ka 23 bad 24 tarik mynta u bnai na bynta ban iathir bad ban wad ia ki daw tynrai halor ka jingshah rem ka Congress ha kane ka ilekshon MDC.
“Ha kine ki sngi nga dang wan Delhi bad nga iakynduh ia ki heh ka AICC ha kaba ki pyntip ba kin wan ha kane ka jylla ha ka 23 bad 24 tarik Lber. Ha kane ka jingialang ngin sa iashong ban sngap ia ka sur jong baroh bad ngin sa wad kiei ki daw ba shah rem,” la ong u bah Ronnie.
Ha kajuh ka por u bah Ronnie ula ong ba ha kane ka ilekshon ba la dep, ym dei tang ka party Congress kaba shah rem hynrei kiwei ki party ruh kum ka NPP kaba ialam ia ka sorkar ka jop tang saw ngut, ka UDP ruh kumjuh.
“Nga tharai ka jingshah rem bun ki party ka dei namar ba ki briew ki kwah ka jingkylla bad ki kwah ban ailad ia ka party thymmai,” ula bynrap.
Halor ka jingsawa ka sur u paidbah ban bujli noh ia u President ka MPCC, u bah Ronnie ula ong ba kane kadei ka jingsngew u paidbah, lehse lada ka don kum kata ka jingsngew ka shong ha ka AICC namar ba ka MPCC ka ju don da ka ilekshon ban jied ia u President. Lehse ioh ki lah ban pynlong ilekshon noh hynrei ka shong ha ka heh ka AICC.