Kynduh mawsiang ka UDP Mawlai ba kynran dien u bah Process

U Working President ka UDP u bah Paul Lyngdoh u la pynpaw ka jingkyrmen ba u kyrtong na Jaiaw konstitwensi u bah Auguster Jyrwa un poi sha ka thong jingjop ha ka ilekshon MDC ka ban sa long shen ha u bnai Rymphang. Haba kren sha ki lad pathai khubor, u bah Paul ula kam ba lada khein lang ia ka vote jong u bad ka vote jong u bah Auguster Jyrwa, ka la poi lypa 70 percent. Ha ka elekshon MDC ba la dep, u bah Paul uba iakhun na ka UDP, ula pylliem ia u bah Auguster na ka Congress hynrei ha kane ka kynti, u bah Auguster ula wan iakhun noh na ka UDP lyngba ka jingkyrshan u bah Paul. U la ong ba ka jingiakop kaba khraw kam dei bad uno uno u kyrtong hynrei ka dei ha ka party kumno ban trei bad kaei kaba lah ban leh.

 “Kaei kaba ngi lah ban leh bad kaei ka jingduna kaba ngi hap ban pynbha ban ioh ia ka jingjop bad kyrmen skhem ba ki paidbah ha kine ki bnai ba la dep, ki la iohi ia ki rong ba shisha jong ki seng sain pyrthei bapher bapher”, la ong u bah Paul. U la ong ba kane kam dei ka drama kaba neh tang lai kynta hynrei ka dei ka jingiakhun kaba la neh da ki snem. “Ha Jaiaw konstitwensi, ngi ialeh pyrshah uwei ia uwei pat ha ka elekshon kaba la dep hynrei mynta ngi la long kawei bad lada khein lang ia ka vote jong nga bad ka vote jong u bah Auguster, ngi la tam lypa 70 percent”, la ong u bah Paul. Ha ka ilekshon, ym lah ban khein sting iano iano hynrei ka thong ka dei beit ban jop.

U la ong ba ka elekshon MP ka iapher bha ha kaba ki briew ki pyrshah ia ki kyrtong kiba don ha ka liang ka sorkar hynrei mynta ki la iohi kaei kaba la jia, ha kaba ka la don ka jingiapher jingmut ha kawei ka seng sain pyrthei (VPP), bad ki briew ki la iohi ia ka jinglong ba shisha jong ki party bapher bapher wat tang ha kine ki khyndiat bnai.“Ka suk bha ban shu thaw seng sain pyrthei, ban pynshongshit ia u paidbah hynrei ha kaba khadduh, ki paidbah ki hap ban peit hadien ba la dep rwai dep shad ha surok, ki khun kin ioh kam nangno, ka ioh ka kot, ka jingeh ka imlang sahlang, hato ngin shu iakhun tang da kaba shu rwai shu shad ha surok. Ha ka sain pyrthei ka donkam ban don ka pasoh ban iasaid bad lada kam don ka pasoh, ka long kaba eh ban pynneh ia kano kano ka party”, la ong u bah Paul. Katba haba iadei bad ka Mawlai konstiwensi, u bah Paul ula ong ba ka party ka shem jingeh ban sei kyrtong na Mawlai namar ba u bah Process T Sawkmie u la kynran dien noh ban iakhun na ka UDP.”Hadien ba u bah PT Sawkmie ula kynran dien noh, ka party ka shem jingeh bad ka shitom ban ioh kyrtong mynta mynta,” ong u bah Paul.