Kynmaw burom ka Jylla ïa u Chief Minister

Ha ka lyngkhuh sngi iap ba 35 jong u Myntri Rangbah ba nyngkong ka jylla Meghalaya u (L) Capt. Williamson A. Sangma ha ka sngi Saitjain la pynlong ia ka jingialang kynmaw burom ia une u riewkhraw ka jylla, uba iohi jngai ban pynioh ia la ka jylla da ka lynti jong ka jingsuk. Ha kane ka sngi, la pyllait paidbah ia ka kot ba la ai kyrteng “Capt. Williamson A. Sangma Architect of Meghalaya” kaba la thoh da u Dr. Andrew Simons uba long u Commissioner and Secretary jong ka Meghalaya Legislative Assembly bad ia kane ka kot la pyllait da u Lamphang ka iingdorbar u Thomas A. Sangma kum u kongsan. U Lamphang haba ai jingkren ula pynpaw ba ula don ia ka jingiajan bad utei u nongialam uba la khlad noh bad pynkynmaw ia ka jinglap jingshem ha ka por ba u leit synran ia u Capt. Sangma ha kylleng ki jylla ha ka por ba u dang long u Myntri Rangbah ka jylla. Ula iathuh ruh ba u Capt. Sangma u ju iai pynkynmaw iaki ba ki dei ban long kiba husiar haba ki leit jingleit bad ki don ruh ki khep ba un thap kai na khlieh haba ki shoh samthiah.

U Thomas A. Sangma ula ban jur ia ka jingaiti u Capt. Sangma ha kaba iadei bad ka jinglong kordor bad ka jingsuk ha ka kam ai jingshakri ia ki paidbah bad ula ong ba ka Meghalaya kala ioh iala ka jong ka jylla khlem da iaid ha ka lynti da kaba iaumsnam, kaba la btin da u Capt. Sangma uba ngeit ba ka jingiaumsnam kan wanlam hi ia ka jingiaumsnam.U Lamphang ula ong, ba u Capt. Sangma udei uwei na ki nongialam uba pawnam bha hapoh Meghalaya ha ka kam sain pyrthei bad ha ki kam kiba iadei bad ka imlang sahlang bad ha ka Hills State Movement ula pyni ia ka jinglong kum u nongialam ba shlur bad uba iengskhem ha ka nongrim.  Nalor kane, ula iaroh ruh ia ka rukom treikam jong u Capt. Sangma ha kaba ula wanrah ia ka jingiatylli hapdeng ki jaidbynriew Khasi, Jaintia bad Garo.“Ka dei namar ka jingtbit ka jongu kum u nongialam ba ki lai tylli ki jaidbynriew kiba kren ia la ki jong ki ktien kila iai neh ban long kiba iatylli” ula ong bad ka bynrap ba u Capt Sangma ula ialam bad matphang ban don ia ka jingburom markylliang bad ban iengskhem lang.Haba kren halor katei ka kot, u Dr. Andrew Simons ula pynpaw ka jingsngewnguh ia kiba haiing ba hasem jong u Capt. Sangma bad ia ka Meghalaya Legislative Assembly Library kiba la ai ia ki jingtip kiba kordor.

U la pynpaw ba watla ia u Capt Sangma udei uba la kynmaw da kiba bun, hynrei ki duna pat ban don ne buh ia ki jingthoh halor ka jingim bad ia u synniang uba la noh bad kane kala pynshlur ia u ban shimkhia ia katei ka kam.“Kane ka sienjam kan long ka jingai jingtip ia ki samla, kaban iarap ia ki ban sngewthuh shaphang ka Hill State Movement, ka jinglong nongialam u Capt. Sangma bad ka nongrim kaba u ieng ba ym dei ban iaum snam” ong u Dr. Simons. U la pynpaw ba watla ym pat ju iakynduh markhmat ia u Capt. Sangma hynrei u don ia ka jingsngew burom bad itynnad ia ka lynti iaid ka jongu ha ka kam sain pyrthei bad kum u nongthawain. Ha ka jingialang jingkynmaw burom la donlang u Myntri Sorkar u Brening Sangma, u Secretary ka Meghalaya Legislative Assembly u Malthus S. Sangma, ki ophisar ka Assembly Secretariat, kiba haiing ba hasem jong u Capt. Sangma, ki samla pule bad kiwei kiba la shah khot sngewbha.