Kynmaw burom ka Sorkar ïa U Soso Tham, pynkup burom ia ki Nongthoh kot Khasi bad Garo

Ka tnat Arts and Culture ka Sorkar Meghalaya hynne ka sngi ka la kynmaw burom ïa ka lyngkhuh sngi ïap ba 84 jong U Soso Tham, u riew pawkhmat ha ka thoh ka tar jong ka Jylla. Ïa kane ka Program ba kyrpang la pynlong ha U Soso Tham Auditorium ka kaba u Myntri ka tnat Arts and Culture u Bah Paul Lyngdoh u la wan shim bynta kum u Kongsan. Haba kren ha kane ka jingïalang, u Bah Paul u la ong ba ka long kaba donkam eh ban pynleit jingmut halor ki jingnoh synñiang kiba dang iai neh jong U Soso Tham sha ka thoh ka tar Khasi, da kaba pynpaw ïa ki kam jong u kum ki ‘Ki Poetry Khasi’, “Duitara Ksiar”, bad “Ki Sngi Barim U Hynñiewtrep”. U Bah Paul u la ai khublei ïa ka bynta ba kongsan jong u Soso Tham ha ka thoh ka tar bad ka jingpyndonkam jong u ïa ki kyntien Khasi ban pynkylla ïa ki Phawar jong u Aesop, kaba long ka mawjam kaba kongsan ha ka histori jong ka thoh ka tar jong ka Jylla.

“Ka kyrteng jong u Soso Tham ka ieng ha khlieh duh jong ka jingtbit ha ka thoh ka tar, bad ngi don hangne ban ai burom ym tang ïa ki kam jong u hynrei wat ïa ka mynsiem jong u kaba ïai bteng ban ai mynsiem ïa ki pateng bynriew” la ong u Bah Paul. Ha ka jingiadei bad kane ka jingkynmaw burom ïa U Soso Tham, ka tnat Arts and Culture ka la pynlong ia ki jingiakop bapher bapher naduh ka 16-17 tarik u Nohprah kynthup ia ka jingpule poitri, ka jingthoh, ki jingkylli, ka jingrwai, bad ka jingdro dur halor ka phang pdeng ‘U Soso Tham u la ngam sha ki thwei jong ka Mynnor ban pynioh pat ia ki Mawlynnai jong ka Pateng kaba Mynta”.

Ha kane ka sngi nalor bala sam iaki khusnam shaki Nongjop ha ki jait jingiakop, la pynkupburom ruh ia u Dr. I. S. Shangpliang (Bam Kwai Dwar u Blei) uba la thoh iaka kot Ka Noh Ka Likai (Aiu Ka Pharshi), bad ka Leylian R Marak kaba la thoh iaka kot Kan.dikgipa Dakmesokanirang. Kane ka jingshah pynkupburom kadei ban ithuh ïa ki nongnoh synniang ba radbah ha ka thoh ka tar haka ktie Khasi bad Garo bad ban ai mynsiem ïa ki nongthoh ban nang pynriewspah shuh shuh ïa ka riti dustur jong ka Jylla Meghalaya.