Kynnoh ka KHNAM ba don 35 tylli ki khyrdop ka KHADC kynthup 19 ha Ri-Bhoi

Ka Khun Hynniewtrep National Awakening Movement (KHNAM) kala kynnoh ba ki don haduh 35 tylli ki khyrdop lum khajna ba pyniaid daka Khasi Hills Autonomous District Council (KHADC).

Kine ki khyrdop ki kynthup 25 tylli ki khyrdop lum khajna jong ka tnad Forest bad 10 tylli ki khyrdop lum khajna na ka tnat Trade.

Kane la kynnoh da u President ka KHNAM u Bah Thomas Passah bad u la ong ba kane ka paw lyngba ka RTI kaiphod bala ioh pdiang naka KHADC.

Haba kren sha ki ladpathai khubor u bah Thomas u la ong ba ha ka 20 Jymmang 2025 ka KHNAM ka la pan daka RTI naka KHADC bad ha ka jubab ba la ioh la lap ba ka District Council ka don 35 tylli ki khyrdop kiba ieng ha u pud u sam ba hap hapoh ka District Council.

U bah Thomas u la iathuh ba u la pan ka RTI ym tang jong mynta u snem hynrei ngi la pan ka RTI naduh u snem 2019 ha ka ba ka tnat Forest ka KHADC ha u snem 2019-2020 ki don 24 tylli ki khyrdop lum khajna, ha u snem 2020-2021 ki don 24 tylli, 2021-2022 ki don 22 tylli ha u snem 2022-2023 ki 19 tylli, ha u snem 2023-2024 ki don 23 tylli ha u snem 24-25 ki don 24 tylli bad ha u snem 2025 ki don haduh 25 tylli kine ki khyrdop lum khajna ka KHADC.

U la bynrap shuh shuh ba ha kaba ia dei bad ki khyrdop ka tnad Trade ha u snem 2019-2020 namar u COVID ym shem la ioh ban buh khyrdop lum khajna hynrei ha u snem 2021-2022 ki don 8 tylli, ha u snem 2022-2023 ki don 8 tylli, ha u snem 2023-2024 ki don 9 tylli kat ba ha u snem 2024-2025 ki don 9 tylli hynrei ha u snem 2025 ki la buh 10 tylli ki khyrdop lum khajna ka KHADC.

U bah Passah u la ong ba ka KHNAM kan sa thoh kawei ka shithi ban ai sha ka Council ban buh ka jingkylli ia ka council halor ki kyndon jong ka Trading by non tribal Regulations 1954 ba ki buh ia ka khyrdop lum khajna na ka tnad Trade.