Kynnoh khlem nongrim u Prof Shukla ïa ka NEHUTA, thmu pynjah burom ïaka Meghalaya

U President ka NEHU Teachers Association (NEHUTA) u Prof Lakhon Kma u la ong ba ki jingkynnoh ba la pynmih da u vice chancellor (VC) u Prof PS Shukla ki dei ki jingkren khlem jingkitkhlieh ha ryngkat ka jingthmu kaba sniew ban pynjah burom ia ka NEHUTA, ia baroh kiwei pat ki nongshim bynta ha ka NEHU bad ia ka Jylla Meghalaya baroh kawei. Kane ka jingkren ka la mih hadien ba u Prof PS Shukla u la thoh sha u Principal Secretary Higher Education ka Sorkar India ha ka 27 tarik u Naiwieng da kaba kynnoh ba ka NEHU Students’ Union (NEHUSU), ba la kyrshan da ka NEHUTA ba la khlieh da u Prof Lakhon Kma ki la thaw jingkulmar naduh 25 tarik Risaw hapoh ka skulbah. Ha ka shithi sha u Principal Secretary Higher Education ka Sorkar India u Prof Kma u la ong ba la thung ia u Prof PS Shukla kum u VC jong ka NEHU tang namar ba u don jingiajan bad ki sengsain pyrthei da kaba buh sha lyndet ia ki kyrtong kiba kham tbit ïa u.

 “U Prof PS Shukla u long tang u nongshah thung ha ka saiñ hima sima bad kumba u la iai dawa ba ki nonghikai ki hap treikam bha hynrei u klet ba ialade um don kyrdang haka pule puthi bad ka long shisha kaba donkam ban bishar bniah kiei ki jingnoh synñiang jong u ha ka pule puthi bad ka jingwad bniah ha NEHU.  Ki kot aiu ba u la thoh bad kiei ki kam kiba ïadei bad ka jingwad bniah kaba u VC u la leh” la ong u Prof Kma. U Prof Kma u la ong ba ha ki lai snem tam jong ka jinglong VC, u Prof Shukla um shym la pynlut kano kano ka pisa ban kyntiew ia ki jingpule bad ka jingwad bniah kam shym la wanrah kano kano ka pisa naka bynta ka bha ka miat ka skulbah NEHU. Ha ka shithi sha u Principal Secretary Higher Education ka Sorkar India, ka NEHUTA ka la ong ba ka jinghiar kyrdan jong ka NEHU ha ka NIRF ka dei namar ka jingpyniaid bakla kaba jur ia ka kam jong ka NEHU ha man la ki kyrdan da u Prof PS Shukla.

Ka shithi ka la kdew ba u Prof PS Shukla um lah ban pynbha ia ka hostel, ka library, ki jingialehkai, ka bam bad kiwei kiwei ki jingdonkam kiba pynlong ia ka skulbah ban iaid beit.“U la pynkiew kyrdan ïa u briew uba duna ka jingtreikam ha ka samoi kaba ar kum u Dean jong ka tnat Social Sciences da kaba kyntait ïa ki 20 ngut ki Professor kiba kham tbit. Kumjuh ruh u la kyntait ia ka jinglong dean ha ki tnat economics, management and information sciences. Ki don bun kum kine ki jingbymhok kiba paw bad ki jingpynkhein thmu ia ka ‘Hok ban iaryngkat’ katkum ka Article 14, 15 & 16 jong ka Riti Synshar jong ngi. Ki kam jong u ki la pynsniew ia ka jinglong jingman jong ka pule puthi jong ka NEHU kaba la wanrah ia ka jingeh kaba mynta na ka bynta kaba, tang ma u, uba hap ban shah kynnoh” la ong ka shithi.