Kynnoh shim kabu ki Karbi ban klun jaka shwa ban pynbeit pud Meghalaya-Assam

U Chief Executive Member (CEM) ka Jaintia Hills Autonomous District Council (JHADC) u Bah Thombor Shiwat u la kynnoh ba ka jingiai mih ki kynrum kynram hapoh ka shnong Lapangap West Jaintia Hills ka lah ban dei ba ki ar tylli Sorkar Jylla ki kwah ban pynslem khnang ia ka jingiakren pynbeit pud ha ka wat ba ar (Second Phase). Haba kren shaki lad pathai khubor u Bah Thombor ula iathuh ka jingialang ba khatduh hapdeng ar tylli ki sorkar Jylla ban iakren pynbeit pud ka dei ha shwa ka ilekshon MLA hapoh ka Jylla Meghalaya. U Bah Thombor ula ong, ba ka shnong Lapangap West Jaintia Hills ka dei ka shnong kaba la rim tam bad ka dei ka shnong kaba la ioh Sanad bad ioh jingithuh na ka District Council.  Ula kynnoh ba ka jingiakynad ba la mih ha Lapangap ka lah ba don ki riew shim kabu namar ka District Council ka lah dep ban ai jingithuh khamtam ban ai syrnod ia ki Rangbah Shnong ban pynskhem ia ka jinglong trai ka Meghalaya ia ka shnong.

“Ha shwa ka jingiakynad na ka liang ka Sorkar Jylla bad ka District Council ngi la hiar ban jurip sha kane ka shnong bad kam dei ba ngi ieh beiñ ia ka Shnong Lapangap. Kum ka Council na ka por sha ka por ka ju iakynduh bad iakren bad ki bor pyniaid ka Karbi Anglong Autonomous Council (KAAC) hynrei u CEM ka KAAC u kyntait ia kata bad um kwah tang ban iakynduh ruh” la ong u Bah Thombor. U CEM ka JHADC ula kam ba ka jingkyntait u CEM ka KAAC ban kynduh ka lah ban dei ba ki jaidbynriew Karbi ki kwah ban shim kabu ia ki jaka puta khamtam ki jaka rep ki nongshong shnong ka shnong Lapangap. “Ki jaidbynriew Karbi ki shim kabu ban kam ia ki jaka ka Meghalaya namar ki tip ba kum kane ka por kin sa don noh ka jingiapynbeit u pud u sam bad ka shong ha ka Sorkar ba kan pdiang ne em ia ka jingklun jaka ki Karbi. Hynrei na ka liang jong ngi wat ki shnong ki bym don shuh kum ka Block 1, katta ka Elaka Labang Nongphyllut, kaba da ki phew snem ym don shuh ba ithuh ia ka hynrei ngi la pynim biang ia ka da kaba ai sanad ia ki Daloi bad ki Rangbah shnong” u la ong.

U la ong ba ka District Council ka peit bha ia ki jaka ki ba hap hapoh ka Council bad ka la dep ruh ba aiti ia ki kot jaka puta sha ka Regional Committee Jaintia Hills na ka bynta ban iakren pynbeit pud hapdeng Meghalaya-Assam. U CEM ula iathuh ba ki shnong ki ba hap hapoh ka JHADC hi ki don palat 500 tylli eiei, kynthup bad ki shnong ha Labang Nongphyllut kaba dei ka Block 1. “Ha kaba ia dei hi bad ka jingiakynad ha Lapangap, kane ka dei ka sien ba nyngkong bad kam pat ju jia eiei bad ka shnong Lapangap, kam dei ka jaka bym don ki nongshong shnong namar ia kane ka shnong la ioh jingithuh na ka District Council, bad ka dei ka shnong kaba hap hapoh Meghalaya” u la ong.