Kynnoh u Bah Shangpliang ba pynduh skhim ka UDP ia ki paidbah

U MLA barim ka Mawsynram constituency u Bah HM Shangpliang u kyntait mardor iaka jingshah kynnoh ba u la pyndonkam bakla iaka pisa kaba kot T.1.25 klur kaba dei ruh ka pisa jong ka SRWP scheme.  Haba kren shaki lad pathai khubor u Bah Shangpliang u la ïathuh ba ki briew kiba kynnoh pyndonkam bakla iaka pisa kidei ki nongkitkam jong ka United Democratic Party (UDP) Mawsynram circle. U Bah Shangpliang u la kam ruh ba ha u bnai Naiwieng 2022 hadien ba u la ieh kam noh kum u MLA kala wan ka hukum (Order) naka Ophis BDO ban nym pyllait shuh iaka Second Instalment jong ka MLA skhim 2022-2023. U la ïathuh ba ka pisa ba kum u MLA udei ba ioh kadei T.2.50 klur hynrei hadien ba u la ieh kam noh kum u MLA u khlem ioh shuh iaka Second Instalment kata kata song pisa ba kot T.1.25 klur.

“Kane ka song pisa ba ki wan kynnoh kadei jong ka Second Instalment bad kadei ka hok jong u paidbah ka Mawsynram bad kane ka jingkynnoh ki nongkitkam ka UDP kadei ban khanglad iaki paidbah ban ioh iaka pisa” la kynthoh kylla u Bah Shangpliang. U Bah Shangpliang u la kubur ba kam dei ka mon jong u MLA ban leit sei iaka pisa hynrei ka jingleit sei kadei lyngba ka hukum (Order) bala wan naka tnat CRD. “Ka don ka hukum (Order) naka tnat CRD kaba kdew ka pisa kadei T.1.25 klur ha ka 3 tarik Nailar 2023 kata hadien ka ilekshon MLA hynrei haka 14 tarik Nailar 2023 kala mih biang sa kawei ka Order bala bthah ba ym lah ban sei iaka pisa daki MLA barim” la pynshai u Bah Shangpliang.

U la ïathuh ba ka pisa kala shu sahkut haka Ophis BDO hynrei haka 6 tarik Nailur 2024 kala wan biang ka Order ba la khien iap noh iaka Order bala pynmih haka 14 tarik Nailar 2023. “Ka Order bala pynmih haka 6 tarik Nailur 2024 ka ai biang iaka hok sha nga kum u MLA ban pyndonkam ïa kane ka pisa kaba dei ka Second Instalment jong ka MLA skhim ban iarap iai paidbah kiba dei hok ban ioh lyngba ka SRWP scheme” u la ong.