Kyntait ka Congress ban shim bynta ha ka Committee iathir lynti Rel

Ka seng Congress hapoh Meghalaya hynne ka sngi kala pynbna ba kan nym don bynta haka All Party Committee ban iakren halor ka jingthmu pyniasoh lynti Rel hapoh ka Jylla.Ia kane la pyntip da u Secretary ka Meghalaya Pradesh Committee (MPCC) u Bah Manuel Badwar. Haba kren shaki lad pathai khubor u Bah Manuel u la ong ba ka jingthaw All Party Committee daka Sorkar Jylla ban iakren halor ka lynti Rel ka pyni shai iaka jingbym lah jong ka Sorkar ban pynbeit iaki mat kiba ktah iaka bha ka miat ki paidbah nong shong shnong ka Jylla.U Bah Manuel u la ong ba kane ka jingthaw Committee ka pyni ruh iaka jingbym lah ka Sorkar ban weng da lade naki jingeh ba la pynsngew daki paidbah nong shnong ka Jylla.

U la ong bunsien ka Sorkar Jylla kam ju sngew donkam ban iatreilang lang bad kiwei ki seng sain pyrthei naka bynta ban shim iaki rai bad kane ka jingthaw Committee kadei tang ban pynthame iaki paidbah. “Hadien baka Sorkar ka sngew baka kala sahkut haki jingeh bad ka sngew ba kam lah ban weng ialade na kita ki jingeh, kumta ka sngew donkam ban iawer lut ïa baroh khnang ban shah kynnoh lang ïa baroh. Kane kam long kaba dei” la ong u Bah Manuel.

“Shaei jah kata ka All Party Committee haka por baka Sorkar Jylla ka thmu wanrah iaki Casino. Shaei jah ka All Party Committee haka por ba iakren pynbeit pud bad ka Jylla Assam” la buh jingkylli u Bah Manuel. Haba pynpaw baka Congress kam treh ban don lang haka All Party Committee, u Secretary ka MPCC u la ong “Iaki la jied daki paidbah ban ialam iaka Sorkar, kidei ban pyndep iala ka kamram kumba la bynshet ki paidbah”.