Kyntait ka HBDRF ia ka kaiphod pynbeit pud ka Regional Committee

Ka Hynniewtrep Border Disputed Redressal Forum (HBDRF) hynne ka sngi ka la ai dorkhas sha u Myntri Rangbah ka Jylla u Conrad K Sangma ba ka kyntait ia ka kaiphod pynbeit pud jong ka Regional Committee halor ka Block-I bad ka Assam namar ka Committee kam pat leit jurip ia ki shnong ki thaw kumta kam lah ban pdiang ia ka kaiphod pynbeit pud ka Regional Committee Meghalaya-Assam. Ha ka dorkhas ka HBDRF ka la ong,“Katkum ki khubor ba mih ha ki lad pathai khubor, la pyntip sha ngi ba ka Sorkar ka la jan dep artad ia ka jingiakren pynbeit pud ka wat ba-ar bad ka Assam. La iathuh ba ka Regional Committee ha Block-I, ka la pynkhreh ia ka kaiphod ban aiti noh sha ka Sorkar. Hynrei ngi pynpaw ia ka jingsngewkhia bad jingbym hun ia ka rukom treikam ka Regional Committee namar la tip ba ka Regional Committee kam shym la leit jurip ia ki jaka haduh kine ki sngi, kaba lah ban pynkulmar jingmut ia ki paidbah ha khappud.”

Ka HBDRF ka la kyrpad ïa u Myntri Rangbah u Conrad K Sangma ba un ai por ia ka Forum ban iakren ia ki jingshisha ryngkat ki kot ki sla ban pynshisha ba ka thain Block-I ka dei ban hap ha Meghalaya. Haba iakren bad ki nongthoh khubor, u Nongaiktien ka Forum bad Working President ka KHNAM Thomas Passah ula ong, “Khlem da leit jurip ia ki shnong ki thaw, lada ka Committee ka shim rai ban aiti ia ka kaiphod, ngi sngew ba ka kaiphod kam lah ban ban pynshong nongrim kat kum kaba dei hok. Ngi la pynpaw ia ka jingdonkam jong ngi hakhmat u CM ba un shah ia ngi ban iakynduh khnang ba ngin lah ban batai ia ka jinglong jingman ka Block-I naduh u snem 1951”.

U Bah Thomas ula kren ruh halor ka video bad kynnoh ba u Myntri Rangbah ula ong ba ka Block-I bad II ka dei kaba la aiti sha ka Assam ha ryngkat bad baroh ki kot ki sla.“Kane ka jingkren ka dei kaba ma namar kat kum ka histori, ngi tip ba ka Block-I bad II la rah sha Assam ha u 1951 haba pynshong nongrim na ka jingpynkha ia ki District Council ha u snem 1952 bad ha ka por ba dang synshar ka Assam bym pat ioh ia ka Jylla. Balei ia ka Block-I bad II la pyniasoh sha ka Karbi Anglong Mikir Hill Autonomous District Council, ka dei namar ka jingsuk ha ka synshar khadar ym namar ba ki jaka ki hap ha Assam lane ha Mikir Hills” u la ong.