Kyntait ka NPP Jirang ia ka jingkynnoh u Bah Victor, lah ban iakhun MDC u MLA

Ki nongialam ka party NPP Jirang Block mynta ka sngi ki la kyntait beit war ia ka jingkynnoh jong u Bah Victor Rani, MDC u ba la mih noh ban pyniasoh sha ka Congress da kaba kam ba u la mih na ka party NPP na ka daw ka jingbym suidñiew ki nongialam bad ka jingiasylla ban pynduh ticket na bynta ka ileksion MDC, hynrei la pynshai ba ki daw baroh hi ka dei ka jingleh jngai hi na ki paidbah ka Jirang Konstituensi kumjuh ia ki nongialam ka party NPP. Haba kren pynshai ha ka jingialang ba la lum kyrkieh da ki heh ka NPP na Jirang Block ba la lamkhmat da u Bah Sosthenes Sohtun, MLA bad President ka Jirang, u Bah Clement Mawlong, District President ka Ri Bhoi District, Bah Marcus Lapasam, President ka Jirang Block NPYF, ki la pynshai bad pynpaw ia ka jingsngewlyngngoh kaba khraw halor ka jingmih noh jong u Bah Victor Rani MDC ka Jirang ban pyniasoh sha ka Congress

Ki la pynpaw, ba kum ka party hi ka kyntait ia ka jingkynnoh jong u Bah Victor Rani u ba la kam ba u la hap mih noh na ka party NPP namar ka jingbym burom ki nongialam hynrei ka dei hi ka mon jong u ban leit ia soh bad ka Congress bad ka daw bah ka long ruh ba ka dei ka jingbym pdiang shuh da ki paidbah ka Konstituensi namar ka jingleh jngai ka jong u ban kynduh ne pynbeit ia kino kino ki kam paidbah. “Na ka liang ki nongialam ka party NPP na ka por sha ka por ki la iai khot ia u Bah Victor ban ia kren ia pynbeit halor ki jingujor ba bun pyrshah ia u lyngba ki paidbah hynrei um ju poi ne wan mih sha ki nongialam ka party kaba kdew shai ba um don shuh ia ka mon ban dang iatreilang bad ka NPP”, ong ki nongialam da kaba kyntait ruh ba ka la don lypa ka jingiasylla ban pynduh ticket ia u kumba la kynnoh da u Bah Rani.

Ha kaba ia dei bad ka ticket, ki nongialam ka npp ki la pyntip ba ki la don 3 ngut kiba la pan ticket ba kynthup ia u Bah Albertus Lapang, Bah Kitboklang Khongiong bad u Bah Balawan Syiemiong, hynrei la mih ruh ka sur jingdawa ba u Bah Sosthenes Sohtun un hap hi ban iakhun ia kane ka ileksion MDC 2025 ha kaba ia ka rai yn sa pynbna pat hadien ka jingialang para nongialam ka party.