Kyntait u Bah Paul ïa ka kam Chairman MSPB,  lah ban thung kum u Chief Adviser ka Jylla

U Myntri Sorkar barim ka jylla ba peit ia ka tnad Social Welfare bad kam jngohkai pyrthei, u Bah Paul Lyngdoh u lah ban shimti kum u Chief Adviser ka sorkar Meghalaya hadien u shah hiar shuki ha ka jingbujli Myntri thymmai ka sorkar MDA dang shen. Katkum ki khubor kiba la iohlum la iathuh ba u Bah Paul Lyngdoh hadien ba ula hiar shuki noh, kumta ka sorkar jylla ka la pyrkhat ban thung noh ia u Bah Paul Lyngdoh kum u Chairman jong ka Meghalaya State Planning Board (MSPB) ia kaba ha kine ki 2 snem shiteng la bat da u President ka UDP u Bah Metbah Lyngdoh hynrei mynta ula iehnoh ia kane ka kyrdan ban shimti noh kum u Myntri Sorkar bathymmai.

Ka la don ruh ka jingpyrkhat ban thung noh ia u Bah Paul kum u Chairman jong ka Meghalaya Tourism Development Council (MTDC) ia kaba ha kine ki 2 snem shiteng kiba la dep la bat da u Bah Sanbor Shullai na ka seng (BJP) uba la iehnoh ia katei ka shuki hadien ba ula leit ban shimti noh dang shen kum u myntri sorkar. Ki tyllong khubor kiba a iohlum, ki iathuh ba u Bah Paul Lyngdoh ula pynpaw ia ka jingbym kwah ban long kum u Chairman ka MSPB ne Chairman jong ka MTDC.U Myntri Rangbah ka Jylla u Conrad K Sangma ula bishar bniah bad u lah ban thung noh ia u Bah Paul kum u Chief Adviser ka Sorkar Meghalaya bad la khmih lynti ba shen ka sorkar jylla kan sa pynmih noh ia ka jingpynbna paidbah ne Notification ha kaba iadei bad katei ka bynta.

 Kumba long mynta la ioh jingtip ba u Myntri Rangbah u dang bishar bniah iano yn pynkhamti ia ka kam Chairman MSPB bad MTDC ha ki katto katne ngut ki Myntri Sorkar ba la hiar shuki dang shen, kynthup ia u Bah AL Hek, Bah Comingone Ymbon, Bah Kyrmen Shylla bad ka Kong Ampareen Lyngdoh. Kumban shu pynkynmaw na ka seng UDP u Bah Paul Lyngdoh bad u Bah Kyrmen Shylla ki la shah pynhiar shuki myntri ha jaka jong ki la shimti noh da u Bah Metbah Lyngdoh bad u Bah Lahkmen Rymbui.