Kynthoh u MDC Laban ba iuh roit ka sorkar ia ka District Council

U MDC ka Laban-Mawprem Constitueny u Bah Ricky Shullai hynne ka sngi ula kynthoh ba ka sorkar jylla kam khein snep ia ka District Council halor ka jingpyntreikam ia ka skhim jong ka 15th Finance Commission lyngba ka Shillong Municipal Board (SMB) khlem ka jingtip ki MDC ka Khasi Hills Autonomous District Council (KHADC). Halor kane u Bah Ricky Shullai ula leit iakynduh ia u Chief Executive Member (CEM) ka KHADC u Bah Shemborlang Rynjah, ban dawa ia ka Council ba kan tuklar mardor halor ka jingpyntreikam ka sorkar jylla lyngba ka SMB ia ki scheme jong ka 15th Finance Commission.

Haba iakren bad ki nongthoh khubor u Bah Ricky Shullai ula ong, ba katkum ka Tender ba la khot da ka SMB ha ka 28 tarik u Nailar 2025, ka la wer ia ki kontraktor ban pyntrei ia ki kam ba hap hapoh u pud u sam jong ki constituency MDC kum ka Jaiaw-Mawprem, Mawkhar-Pynthorumkhrah, Laban-Mawprem bad Laitumkhrah-Malki, khlem da burom ia ka bor jong ka KHADC bad ban pyntlot ia ka rukom treikam jong ki MDC. Ula ong ba kitei ki skhim ba dei na ka bynta ki constituency jong ki MDC, naduh ki por mynshwa la pyntreikam da ka KHADC ha ryngkat ka jingiatreilang bad ki MDC, kumta kane ka jingleh jong ka sorkar jylla ka long kumba iuh roit ia ka bor jong ka KHADC, kaba la shah pynkup bor katkum ka Sixth Schedule jong ka riti synshar ka ri India.

U Bah Ricky Shullai ula pynpaw ia ka jingsngewkhia ba kane ka rukom leh ka buh ha ka jingma kaba khraw, da kaba ai lad ia ki skhim kiba dei na ka bynta ki paidbah jong ka district la pynkhamti noh ia ka bor ha ka kynhun na shabar khlem da kynthup lang ia ka Council.”Kum u MDC uba la shah jied na ka 15 Laban Mawprem Constituency, Nga pyrshah jur ia kane ka rukom leh. Nga la shimkhia ia kane ka mat bad u Chief Executive Member (CEM) ka KHADC ban dawa ba u dei ban tuklar mardor bad ban pan jingpynshai na ka sorkar jylla” la ong u Bah Shullai. “Nga pynthikna ia ki paidbah jong ka constituency jong nga bad ia ki paidbah baroh ba ngan bteng ban iada ia ka bor bad ia ka jinglong kongsan ka  District Council bad ban pynthikna ba ki skhin ba dei na ka bynta ki briew kim dei ban shah rah jubor noh ne shah pynkynriah noh shawei” la pynkut u Bah Ricky Shullai.