Kyntiew kyrdan ka NEIGRIHMS ia ka Forensic Toxicology sha ka GCMS

Ka tnad Forensic Medicine, NEIGRIHMS ka la kyntiew ïa ka Laboratory jong ka da ka lad treikam GCMS (Gas Chromatography and Mass Spectrometry). Kane ka tiar bishar bniah ka pynlah ban ithuh bad khein thikna ia ki jait bih (poisons) bapher bapher na ki nongmuna ba la shim na ki jaka sumar bad na ki nongmuna ba la shim na ka snam bad ka um pynjhieh. Ia kane ka jaka la plie paidbah ha ka 2 tarik Nailar 2025, da u Director NEIGRIHMS, u Prof. (Dr.) Nalin Mehta, uba ka jinglong nongialam ba shlur jong u ka la ialam ia ka jaka pule sha ka jingtbit ha ka liang ka saian sumar (medical science).

U Prof. AJ Patowary, HoD ka Tnad Forensic Medicine u la pyntip ba ka Lab kan sdang ban test ïa ki nuksa na ki tnad ba hapoh jong ka NEIGRIHMS na ka bynta ban bishar bniah ïa ka jingbha bad jingbun jong ka kyiad ha ka snam bad hadien kata kan pynïar ïa kine ki jingshakri sha kiwei pat ki jaka treikam ryngkat bad ka jingthew bniah kaba kham iar ia ki bih. Ka jaka kan long kaba kordor bha ha ka thain na ka bynta ka jingpeit bniah ha ka toxicology ha ka jingtohkit jong ki pulit.

Nalor kata, ka Tnad Forensic Medicine ka la pyndep ruh ïa ka hands-on training halor ka Virtual Autopsy ryngkat bad hynriew ngut ki nongïashim bynta na ki jaka pule ba pawnam bapher bapher jong ka ri India. Lah ban kdew ba ia kane ka jinghikai la pynlong da ka jingbei tyngka na ka DHR (Tnad Health Research). U Director ka NEIGRIHMS u la sam ïa ki syrnot sha ki nongïashim bynta hadien ba ki la pyndep ïa ka jinghikai. U Dr. Mehta ha ka jingkren jong u, u la iaroh ia ka tnad kaba la trei shitom ban sdang ia kane ka kam thymmai bad khmih lynti ba ia ka jingtip ba la ioh da ki nongiashim bynta ha ka por ba ai jinghikai yn sa pynphriang sha kiwei pat ki bynta jong ka ri ruh kumjuh. U Prof. (Dr.) C. Daniala, Dean In-Charge bad Medical Superintendent, u Prof. (Dr.) Suvamoy Chakraborty ki la ai khublei ia ka tnad na ka bynta ki jingjop jong ka.