Kyntu u CM ia ka KHADC & JHADC ban pynkylla noh ia ka AD Rules

Ka Garo Hills Autonomous District Council (GHADC) kaba la ialam da ka seng National People’s Party (NPP) kala pynkylla ia ka AD Rules bad kala pynlong kongsan ba baroh ki kyrtong kiba iakhun ia ka elekshon MDC jong ka GHADC kidei ban don ia ki syrnot Scheduled Tribe (ST) bad kane kan khang pyrshah ia ki bar jylla ban iohlad ban iakhun ia ka elekshon jong ka GHADC.

Lah ban ong, ba kane ka jingpynkylla ia ka AD Rules kadei hadien 74 snem naduh ba la thaw ia ki Autonomous District Council ha ka jylla Meghalaya ha u snem 1952 bad kane ka jingpynkylla kan khanglad ia ki bar jylla ki bym dei ki riewlum ba kin iohald ban iakhun ia elekshon MDC sha ka GHADC.

U Myntri Rangbah ka Jylla Conrad K Sangma, ula ai ka jingiaroh ia kane ka sienjam kaba la shim da ka Executive Committee kaba la ialam da ka NPP, kum ka kam kaban sah jingkynmaw ha ka histori jong ka GHADC, kaba shong ia ka Dorbar Kyrpang hynne ka sngi Nyngkong.

Haba kren ha ka jingialang hakhmat ka ophis treikam jong ka NPP ha Tura, u Conrad ula ong, “Mynta ka sngi kadei ka dorbar kyrpang ka District Council. Ka iingdorbar kala mynjur ia ka ‘Resolution’ ka ban sah khana ha ka histori….kaba la pynlong kongsan ia kino kino ki kyrtong ki ban iakhun ia ka elekshon ka Council ba kin hap ban don ia ki syrnot Scheduled Tribe”.

Ula ong, ba kane ka dei ka rai kaba kongsan bha, namar ba ki District Council kidei kiba la mang beit thik tang ia ki riewlum jong ka thain. Kadei ka jingdawa kaba la sahteng la slem bha jong u paitbah hynrei ha kine ki 74 snem bala leit, ym don satia ki Sorkar lane ki District Council kiban lah leh eiei halor kane ka bynta.

Hynne ka sngi, da ki hajar ngut ki paidbah kila ialum hakhmat ka Ophis ka NPP ban iashad kmen halor ka jingurlong ka jingangnud jongki paid riewlum ban khanglad ia ki bar jylla ba kin iakhun ne thep vote ha ka elekshon GHADC.

U Conrad ula ong, “Nga thikna ba baroh ki paralok ki bym dei ki riewlum kin sngewthuh ba kane ka Council kadei kaba la pynkha khnang na ka bynta ki riewlum bad Nga thikna ba kan don ka jingiatreilang na baroh ki liang bad ngi baroh ngin iatreilang hapdeng ka jingsuk bad ka shongsuk shongsain ban pynthikna ba ngin pyntyllun shakhmat ia ka ri-lum Garo bad ka Jylla baroh kawei”.

Ha kawei pat ka liang, u Myntri Rangbah ka Jylla u Conrad K Sangma, ula pynpaw ha ka rynsan Social Media ka jongu, da kaba kyntu ia ka Khasi Hills Autonomous District Council (KHADC) bad Jaintia Hills Autonomous District Council (JHADC), ba kin pynkylla lang noh ia ka AD Rules, ban pynthikna ba tang ki riewlum kin iashimbynta ha ki elekshon MDC.

“Ka sngi kaban sah jingkynmaw ia ka GHADC ba kala pynkylla ia ka Rules ban pynlong kongsan ban don ia ka syrnot Schedule Tribe (ST) ban iakhun ia ka elekshon GHADC…Ka jingdawa kaba la sahteng la 74 snem….Kyntu ia ka KHADC bad JHADC ban mynjur lang ia ka Amendment ne jingpynkylla ha ka mynsiem ba shisha na ka bynta ki jaidbynriew riewlum”.