Kyntu u Conrad ban lum ki khana shaphang ki jaidbynriew Khasi, Garo bad Jaintia

U Myntri Rangbah ka Jylla u Conrad K Sangma ula ban jur ia ka jingdonkam ban lum ia ka thup jingthoh ba kham jylliew ia ki histori jong ki jaitbynriew, ki ktien, ki jingleh niam, ki rukom shad bad ki jingsdang jong ki nongwan seng shnong.Haba pynpaw ïa ki jingduna ha ka kolshor, u Conrad u la kdew, “Tang ha ka kolshor jong ki jaidbynriew Garo, ki don bun tylli ki tem drum bad bun tylli ki rukom shad Wangala ha kaab tang ki nongtem drum kiba lah ban sngewthuh iaka jingïapher, hynrei ym don ki jingthoh” da kaba kyntu ban wad bniah shaphang kine lyngba ka jingkyrshan naka Chief Minister’s Research Grant.U Conrad u la pynshlur ïa ki skul ban pyni ïa ki drama halor ki riewkhraw jong ka Meghalaya kum u Tirot Sing, u Kiang Nongbah bad u Pa Togan Sangma ban pynrung ïa ka jingsngew sarong bad ka jingïatylli hapdeng ki samla.U Myntri Rangbah u la kren ïa kine ha ka jingplie ia ka 4th Edition jong ka Tamasa Tri Hills Ensemble ha Ward’s Lake kaba dei ka tamasa ka pyndonburom ia ki kam shna jingshna, ka kolshor, bad ki jingbam tynrai jong ki Khasi, Jaintia, bad Garo.U Conrad u la ai khublei ïa ka Tnad Arts & Culture kaba la thaw ïa ka tamasa kaba pynphai biang ïa ki nong shong shnong sha ki tynrai, kaba pynpaw ïa ki bynta bapher bapher jong ka kolshor jong ki Khasi, Garo bad Jaintia sha ka pyrthei.U la pynksan ïa ka jingdonkam jong ka Tri Hills Ensemble, da kaba kdew ba ka phang pdeng mynta u snem, ‘Rivers, Roots, and Revival’, ka pynpaw ïa ka jinglap biang ïa ki riti dustur kiba la jah, kynthup ïa ki jingïakob kieng lieng kiba la ju pynlong shisien ha Dawki bad kiwei kiwei ki jaka.

U la kdew ba katba ka Meghalaya ka dang bteng ban ioh ia ka jingkiew stet ha ka ioh ka kot kaba kiew stet tam ha ka ri hadien ka Tamil Nadu, ka jingpynneh pynsah ia ka jinglong tynrai ka dei ban long ka ba donkam bha.U Myntri Rangbah u la pynkut da kaba pynpaw ïa ka jingkyrmen na ka bynta ki jingïakylliang kolshor kiba kham khlaiñ bad u la ai ka jingkitbok kitrwiang ïa baroh ki nongïashim bynta bad ki nongïoh khusnam. Naka liang u Myntri ka tnat Arts & Culture, u Bah Sanbor Shullai u la pynpaw ba kane ka tamasa ka burom ïa ka pateng ba neh jong ki jaitbynriew Khasi, Jaiñtia, bad Garo, da kaba pyndonburom ïa ka kolshor, ka ktien ka thylliej, ka put ka tem, ki jingbam tynrai, bad ki kam shna jingshna jong ki. U Bah Sanbor u la kdew ba ka Meghalaya Arts and Heritage Awards ka ithuh iaki nongai jingmut kiba pynneh pynsah ïa ka jinglong kyrpang, kumjuh ruh ïa ki samla kiba jop kiba haki jingiakop bapher bapher. U la ai khublei ruh ïa ki projek wadbniah bad jingthoh kot halor ka kolshor, kynthup ïa ka jingïarap wadbniah lyngba ka Chief Minister’s Research Grant kiba pynthikna ïa ka jingpynneh pynsah ïa ka jingtip kolshor na ka bynta ki pateng ban wan. Haba iakren shaphang ka jingpynmih biang ia ki jingiakop lieng tynrai, u Myntri u la batai ia ka kum ka jingwanphai biang jong ka pateng kaba pyniasoh lang ia ki samla, ki nonglehkai, ki nongtrei kti, bad ki nongpyniaid ha ka jingpyrshang lang ban pynim ia ka kolshor.

U Nongai buit ka Sorkar Jylla u Bah Paul Lyngdoh u la pynpaw ïa ka riewspah jong ki kam ha ka Tri Hills Ensemble ha kaba kawei pa kawei ka don tynrai ha ka kolshor jong ka Jylla. U Bah Paul u la kdew ïa ka jingdonkam ban pynïasoh ïa ki samla bad ki tynrai jong ki, khamtam ha ka juk ba la pynwan dur da ka jingstad thymmai, bad u la kdew ruh ba ki nong iashim bynta haka tamasa ki pynpaw ïa ka jingstad jong ki kpa tymmen. U Chief Secretary ka Jylla u Shakil P Ahammed, IAS u la pynpaw ia ka bynta jong ka jingwad bniah ia ki jingtei barim bad ka jingrwai ha kaba ithuh pura ia ki por ba la leit noh da kaba buh jingthoh ia ki shnong ki thaw, pynlong ia ki jingwad bniah, bad iasam ia ka jingtip. U Chief Secretary u la kdew  ba kum kine ki jingthmu ba la kyrshan lyngba ka Chief Minister’s Research Grant ka lah ban pynneh pynsah na ka bynta ki pateng ban wan.

U la ong ba ka jingai jingïarap lyngba ka Chief Minister’s Research Grant ka la kyrshan ïa ki 48 ngut ki riewstad kiba wad bniah ïa ka jingstad tynrai, ki rukom treikam jong ka kolshor, ka jingwad bniah ïa ka pateng ba la pyndonkam, bad ki kot ki sla, kaba ïarap ban lap biang ïa ki rukom wadbniah tynrai bad ki rukom sumar tynrai. U la ban jur ba ki tynrai jong ka kolshor ki long kiba donkam bha na ka bynta kano kano ka jaitbynriew, ki shakri kum ki jingkieng kiba pynïasoh ïa ki briew bad ka pateng jong ki bad kiba pynsah ïa ki ha ka nongrim.Naka liang u Eoghan O’Regan u la ai khublei ïa ki nongpynïaid halor ka jingshah khot sngewbha bad u pynpaw ïa ka jingkmen ban wan jngoh ïa ka nongbah Shillong. U la pynpaw ïa ka jingïadei paralok kaba jylliew hapdeng ka Meghalaya bad ka Ri Wales, da kaba kdew ba u Thomas Jones uba la pynrung ïa ka ktien Khasi sha ka rukom thoh u dang sah kum ka dak jong kane ka jingïadei, kaba la rakhe ha ka sngi Thomas Jones ha baroh ar tylli ki thaiñ. Haba kdew sha ki jingkren ha ki tamasa kiba kham mynshuwa kiba rakhe ïa ka kolshor ba im jong ka Ri Khasi, u Eoghan O’Regan u la ong “Ka Wales ka ïasam ïa ka mynsiem kolshor kaba kum kata kaba la shim ha ka motto “amarhid,” kaba mut “dang hangne,” kaba pynpaw ïa ka jingsngew sarong ha ka ktien bad ka kolshor kaba neh. U O’Regan u la kren shaphang ka jingroi jong ki jingïadei ha ka kolshor, kynthup ïa ki nongtem Khasi kiba pule ïa ka jingtem ha Wales, ka jingpyndonkam ïa ka kum ka jingsumar ha Gordon Roberts Hospital, bad ka jingïakylliang ki nongrwai hapdeng ka Wales bad ka Meghalaya.

Hashuwa kane u Principal Secretary ka tnat Arts and Culture u Bah Frederick R Kharkongor u la pynpaw ïa ka jingpynleit jingmut jong kane ka tamasa halor ki wah bad ka jingpynmih biang ïa ki jingïakop king lieng tynrai, da kaba buh dur ïa ka kum ka jingpynphai biang ïa ka pateng ba im. U Bah Frederick u la pynksan ïa ki jingïadei ha ka kolshor jong ka Meghalaya–Wales bad u la pynpaw ïa ki jingnoh synñiang sha ka ktien, ki jingbam, bad ki jingthmu jong ka imlang sahlang bad u la ong ba ka Mega Arts bad Heritage Awards ka ai jingithuh ïa ki nongrim jong ka kolshor, ki sur ba dang mih, bad ki nongshad kiba pynwan dur ïa ka kolshor jong ka Jylla.U la pynpaw ruh ïa ka jingïarap wadbniah lyngba ka Chief Minister’s Research Grant bad ka projek “Revisiting Our Roots”, kaba wad bniah ïa ki tynrai ba rim bad ba wan seng shnong jong ki jaitbynriew Khasi, Jaiñtia, bad Garo lyngba ki jingwad bniah bad jingïatreilang ha ki riewstad.Ha kane ka tamasa la sakhi ki kynhun nongtem bapher bapher kynthup ka Khasi Cymru, Ground Breakers jong ka Khatsaw Phra College, Twelve-Tet jong ka State Institute for Arts & Culture, Baby Floyd na Bhutan lyngba ka jingkyrshan daka Indian Council for Cultural Relations. Ha kane ka janmiet la kynthup ïa ka jingithuh bad ai khusnam ïa ki riew shimet bad ki kynhun hapoh ka Meghalaya Culture & Cuisine Awards bad ka Meghalaya Arts & Heritage Awards, kynthup ïa ki nongpynmih ïa ka ktien Khasi, ki nongthaw jingmut ha ki rukom shet tynrai, ki jingsdang ha ki jaka buh kot ha ka imlang sahlang, ki riew shemphang ha ka kam khaii pateng bad ki riew shemphang ha ki kam khana pateng. Ha kane ka sngi la pyni ruh iaka phlim Saitar lyngba ka jingkyrshan daka Chief Minister’s Research Grant, ki jingthoh wadbniah ha ka portal jong ka CMRG, ka jingpynrung kyrteng dkhot ha ka online library, ka kaiphod Rasong National Tribal Festival Report bad ka CMRG. Ki jingpyllait kot ki kynthup ki kot jong Ana Notsu bala pynkylla shaka Biate da Anthony Durpui bad Ringmunfeli Nampui ha ryngkat ki jingnoh synniang jong ka kong Silbi Passah bad Khrawbok Shadap.