Kyntu u MR ia ki nongrep ka Lapangap ban sangeh shwa ka leit ot kba

U Myntri Rangbah ka Jylla u Conrad K Sangma ula ong ba sorkar ka sngewsih ban tip ba ki nongrep ka shnong Lapangap West Jaintia Hills kim ioh lad ban leit ot kba, hynrei ula kyntu ia ki ban ap ia ka jingpynbna jong ka Sorkar namar ka Sorkar ka buh hakhmat eh ia ka bha ka miat ki paidbah khamtam ia ka jingim kum ha kane ka por ba don ka jingiakynnad. Kane ka jingkyntu u Conrad ka wan shisngi hadien ba ki nongshong shnong Lapangap ki la dawa na ka Sorkar ban pynbun ki bor pahara khnang ban ioh leit ot kba. Haba kren shaki lad pathai khubor u Conrad ula ong, ka jingkajia ha ka 9 tarik mynta u bnai ka dei ka jingjia kynsan kynsan wat hapdeng ka jingdonlang ki pulit ka Meghalaya bad Assam. U Conrad ula ong, ba watla ka Sorkar ka sngewkhia ba ki nongrep kim ioh lad ban leit ot kba hynrei ka sngew dei ban kyntu shwa ïa ki paidbha ban sangeh shim kino kino ki sienjam ha ki thaiñ khappud, namar kane kan lah ban wanrah biang ka jingïakynad ban wanrah ka jingsngewsih kumba la jia ha ka 9 tarik mynta u bnai.

“Hoid ka dei ka aiom ot kba hynrei ngim lah ban pynthikna ba lada ki paidbah ki leit ot kba kan nym mih shuh ka jingïakynad kumba la jia ha ka 9 tarik Risaw. Namar kata nga la ïakren bad ki nongialam shnong Lapangap ba ki dei ban ap shwa ia ka jingpynbna namar ka Sorkar Meghalalaya ka dang don hapdeng ka jingiakren bad ka Sorkar Assam ban pynthikna ba kum kine ki jingjia kan nym jia shuh ha ka por ba ki nongrep ki leit ot kba” la ong u Conrad.

U Myntri Rangbah ula ïathuh ha ka jingkynduh ia ki nongialam ka shnong Lapangap ha ka 14 tarik Risaw, ki nongialam shnong ki la kyrpad ïa u ban ïakren bad ka Sorkar Assam bad ka Karbi Anglong Autonomous Council (KAAC) ban pynthikna ba ki jaidbynriew Karbi kim dei ban pynwit shuh ia ki paidbah haba ki leit ot kba. “Nga la pynsngewthuh ia ki ba ka Sorkar Meghalaya ka iai bteng ban ïakren bad ka Sorkar Assam kumjuh ruh ka KAAC, nalor kata ki Bor District ka Meghalaya ki ïakren naka por sha ka por ba ki Bor District Assam” ula ong.