Kyrmen ka FKJGP ban urlong ka Mawhati Block bad surok Sonidan sha Umsiang

Sa shisien pat, ka Federation of Khasi Jaintia and Garo People (FKJGP), ka la dawa na ka sorkar jylla ban pynioh noh ia ka jingdawa halor ka Mawhati C & RD Block bad ia u surok na Sonidan sha Umsiang ban pei lyngba sha Topatoli, Assam ha ka jinglut kaban kot 130 klur eiei. Na ka liang u General Secretary ka FKJGP North Khasi Hills District, Bah Shanlang Diengdoh haba kren bad ki Lad Pathai khubor, u la ong, ba ka jingdonkam ia ka Mawhati C & RD Block bad ban siang noh ia surok na Sonidan sha Umsiang ka dei ka jingdawa kaba la kham slem ha kaba na ka liang ka seng ka la dep ban dawa na ka sorkar jylla.

U la iathuh ruh, ba dang shen u Symbut Myntri Rangbah ka jylla, u Bah Prestone Tynsong ha ka jingkren paidbah ha ka jingialang kaba la long ha ka shnong Nongjri, u la pynpaw ba ka sorkar jylla kan pynurlong noh ia ka jingdonkam ia ka C&RD Block bad ban siang noh ia u surok ba 130 klur na Sonidan sha Umsiang. Na ka liang ka seng ka la dawa na ka sorkar jylla ba kan pynioh noh kham kloi ia kane ka jingdonkam jong u paidbah khamtam ha kaba ia dei bad ki lad pynroi ban kyntiew ia ka dong ka thaiñ ha Mawhati, da kaba bynrap ruh, ba ka seng ka kyrmen skhem ba ka jingkren u Bah Prestone Tynsong kan urlong noh shen.

Shuh shuh ruh, ka FKJGP ka la pynpaw ia ka jingsngewkmen bad ai jingiaroh ruh ia u Bah Charles Marngar, MLA ka Mawhati u ba la sngap bad kloi ban leit rah ia kine ki mat jingdonkam jong u paidbah ha ka sorkar jylla bad ki don ka jingkyrmen ba ka jingtynruh jong u MLA ruh kan long kaba jop.