Kyrshan ka MPCC ia u Rahul ha ka jingialap tuh vote ka BJP

Ka Meghalaya Pradesh Congress Committee (MPCC) ka ai ka jingkyrshan ba pura ia ka jingialap Campaign u Rahul Gandhi halor ka jingkynnoh ba tuh vote ne Vote Chor ka BJP. Haba kren hynne ka sngi sha ki lad pathai khubor ka Working President ka MPCC ka Deborah Marak ka la ong ba ka MPCC ka ai jingkyrshan ruh ia ka Signature Campaign jong ka All India Congress Committee (AICC) ban pyrshah halor ka jingtuh vote ne ‘Chor Vote’ ha ka ri. Ka Working President ka MPCC ka Deborah Marak ka la iathuh ba ka Congress ka la sdang ia kane ka Campaign ha kylleng ki jaka jong ka ri bad la buh thong ban ioh 5 klur ka jingsoi na ki paidbah ban pyrshah ia ka jingtuh vote ka BJP.

Ka Deborah ka la iathuh ba ha kane ka jylla ruh ki la pyllong ia kane ka Signature Campaign ha kylleng ki jaka jong ki District ka jylla bad haduh mynta ki la don haduh 10,000 hajar ngut ki paidbah kiba la mih shakhmat ban ai jingsoi ha kane ka Campaign.“Ha jylla Meghalaya ruh ngi leit na kawei ka Block sha kawei ka block bad haduh mynta ki la don haduh 10,000 tam ki briew kiba la rejistar bad soi ba ki pyrshah ia kane. Kane ka Campaign kan dang iai bteng ha kine ki bnai ban wan,” ong ka Deborah. Ki la kyntu ia ki paidbah ka jylla ba kim dei ban khein sting halor kane bad kim dei ban shong sngap jar ia kane ka ishu kaba ktah ia ka synshar paidbah.

Ula ong ba ha Bihar ki don haduh 60 lak ngut ki la shah weng kyrteng thep vote bad ha Karnataka kumba 1 lak ngut ki la shah weng kyrteng thep Vote.U Secretary ka MPCC u bah Manuel Badwar ula ong kane ka jingpyrshang ban tuh vote, ka jingpynjah kyrteng bad ka jingpynrung kyrteng tuh, ka long tang ka buit ba ka BJP kan don ha ka bor.Ula ong ba kaba sngew lehrain ka long ba la pyndonkam ia ki dur jong ki briew kiba nabar tang ban pynrung kyrteng thep vote ha ka ri.