Kyrshan skul ka KSU ïa 10 ngut ki khynnah ba duk

Ka Khasi Students’ Union (KSU) West Khasi Hills District Unit kum shibynta ban ai mynsiem ïa ki longïing kiba shem jingeh ha ka ïoh ka kot, ka la kner jingïarap sha ki khynnah pule kiba shem jingeh ban bteng ïa ki jingpule jong ki.

Lyngba kane ka sienjam, ka seng ka thmu ban kyrshan ïa ki khynnah ba kin nang ïai bteng ïa ki jingpule jong ki haduh ba kin poi sha ki kyrdan kiba kham shalor ha ka pule puthi.

Haduh 10 ngut ki khynnah pule, kiba kynthup ïa ki kynthei bad shynrang, ki la ïoh jingïarap ha ki jingpule na katei ka seng. Napdeng kine ki khynnah, don ruh kiba la ïoh jingïarap na ka seng naduh ki snem kiba la leit noh, kata naduh u snem 2020 ter ter.

U samla Franklin Syiemiong, General Secretary ka KSU WKH u la ong ba ka seng ka shim ïa kane ka lyngkor ban kyrshan ïa ki khynnah kiba wan na ki longïing kiba duna ka ioh ka kot da ka jingthmu ban ai mynsiem ia kito kiba don shisha ka jingangnud ban ïai bteng ïa ka pule puthi.

U la pynpaw ba ka seng kam kwah ba ki khynnah kin duh noh ïa ka lad ban pule ne ban pep skul shiteng por tang namar ba ki kmie ki kpa kim lah shuh ban kyrshan ïa ki. Kumta ka seng ka mih shakhmat mynta ban kyrshan hi dalade ia kine ki khynnah na ka bynta ka lawei ba phyrnai jongki.

Ïa kane ka prokram la pynlong ha ka hall jong ka ophis BDO Nongstoiñ C&RD Block ha ka jingïadonlang ki nongialam bad kiwei ki dkhot ka seng. Ïa kane ka jingïalang la pynïaid da u samla Copperfield Khardewsaw, Education Secretary ka seng, kum u shongknor jong katei ka sngi.