La aiti ïa ka jingtyrwa ban ithuh ïa ka Jingkieng Jri kum ka UNESCO World Heritage

U Vishal V Sharma, U Nongrah Tiensyiem bad Permanent Representative ka ri India sha ka UNESCO ula aiti ia ka jingtyrwa ha u Lazare Assomo Eloundou, Director jongka UNESCO’s World Heritage Centre ban pynrung ia ka “Jingkieng Jri/ Lyu Chrai Cultural Landscape, Meghalaya” ha ka thup jongka UNESCO World Heritage ha u snem 2026-27.

U Vishal V Sharma ula ai khublei ia u Myntri Rangbahduh ka ri u Narendra Modi, u Myntri ka Sorkar Pdeng uba khmih ia ka Kolshor u Gajendra Singh Shekhawat, u Myntri Rangbah ka jylla Meghalaya u Conrad K Sangma, u Principal Secretary u Bah FR Kharkongor, ki ophisar jongka Achaeological Survey India, Ministry of External Affairs, ki riewstad bad ki shnong ki thaw kiba iada ia katei ka jingdon jingem jong katei ka jaka kaba don nam ha ka histori.

Ka Jingkieng Jri ka don ha kylleng ka rilum Khasi bad Jaintia jong ka Meghalaya, kane ka jingphah ia ka jingtyrwa kadei kaba pyni ia ka jinglongtrai ia ka jinglong jingman ka kolshor kaba im kaba la don naduh ki por hyndai hynthai da ki paid Khasi bad Jaintia bad ka pyni ia ka jingiadei naduh tynrai bad ka jingbha jingmiat hapdeng ki paitbah bad ka mariang.

Ka jingaiti ia katei ka jingtyrwa ka pyni ba ka ri India ka don ia ka jingkitkhlieh ban ithuh bad iada ia ka kolshor kaba riewspah bad ia ka jingioh pateng naduh hyndai hynthai.

Na ka liang u Myntri Rangbah ka Jylla u Conrad K Sangma hynne ka sngi, ula pynpaw ka jingsngewnguh ia u Myntri Rangbahduh ka ri u Narendra Modi bad ia u Myntri ka Sorkar Pdeng uba khmih ia ka tnad Kolshor u Gajendra Singh Shekhawat halor ka jingjied ia ka Jingkieng Jri jong ka Jylla ban phah ia ka jingtyrwa ban ioh ia ka jingithuh ha ka UNESCO World Heritage Site.

U Conrad ula pynpaw ba ka jingphah ia ka jingtyrwa ba ia ka Jingkieng Jri / Lyu Chrai Cultural Landscape (Living Root Bridge Cultural Landscape) ban pynrung ha ka thup jong ka UNESCO kum ka World Heritage List kadei ka khyllipmat kaba khraw ia ka jylla bad ia ki paitbah.

Ula ong, ba kane ka jingtyrwa ka pyni ia ki 8 snem jong ka jingiatreilang kaba kynthup ia ki 63 tylli ki shnong, 42 tylli ki Cooperative bad 120 tylli tam ki Jingkieng Jri, kaba pyninam ia ka jingiatylli, ka jingshimkhia da ki shnong ki thaw ha kaban pynneh pynsah ia ki jingdon kiba naduh hyndai hynthai.