Lada ka Sorkar ka don mynsiem shynrang, mynjur sa kawei ka Resolution ban pyntreikam ILP

U President ka Khasi Student Union (KSU) u Samla Lambokstarwell Marngar ula ban jur ba ka Sorkar Jylla ka donkam ban mynjur biang sa kawei ka Resolution hapoh ka Iingdorbar Thawain Ain ban pyntreikam noh ia ka Inner Liner Permit (ILP) hapoh Meghalaya.
U President ka KSU ula ong ia kane haba kren halor ka jingbym don ki ain, ki kanun ba khlain ban iada ia ka Meghalaya na ka jingwan buhai shnong beain ki bar Jylla.
Haba kren sha ki lad pathai khubor u Samla Lambokstarwell ula ong, khyndiat snem mynshwa ka Sorkar Jylla ka la plie ia ka khyrdop ha Umling Ri-bhoi District hynrei mynta kane ka khyrdop (Iing) ka la kylla iingjah pynban.
Ula ong ka khyrdop ba kylla iingjah ha Umling Ri-Bhoi District ka dei ka ain ba mih na ka Meghalaya Residents Safety and Security Act (MRSSA).
“Ka seng naduh ba sdang ka iai ban ia ka jingdonkam ban pyntreikam ia ka ILP ha Meghalaya ban iada na ka jingwan buhai shnong beain ki bar Jylla” ula bynrap.
U Samla Lambokstarwell ula ong, lada ka Sorkar Pdeng ka dang leh mynthi bad ka dang pule sah ia ka Resolution ban pyntreikam ILP ha Meghalaya ba la mynjur da baroh 60 ngut ki MLA hapoh ka Iingdorbar Thawain Ain, ka sur ka long ba lada ka Sorkar Jylla ka don mynsiem ba shynrang ka dei ban mynjur biang sa kawei ka Resolution ban pyntreikam ILP ha Meghalaya
U President ka KSU ula ong ruh shen ka CEC kan shong jingialang ban shong pyrkhat, ia ki sienjam ba ka seng kan shim ban pynbor ia ka Sorkar ba ki ain ki kanun ba khlain ka dei ban pyntreikam noh kloi ban iada ia ka Meghalaya na ka jingwan buhai shnong beain ki bar Jylla.