Lada pahuh um ha Dam, lah ban die bording sha kiwei Jylla: AT Mondal

U Myntri ka tnad Bording u AT Mondal hynne ka sngi Palei ula ong ba ka jinghiar ka um ha ka pung Umiam kam dei satia kaba don bynta bad kano kano ka jinglait tuh (Leakage) ne ka jingtuid suki suki (Seepage) jongka um. “Ka jinghiar ka um ha pung Umiam kam dei satia kaba don bynta eiei bad ka jinglait jong ka um. Bun ki briew kila pynpaw ia nga ba ka um kala don ha u bnai Kyllalyngkot bad Rymphang ha ka por ba ki dang shna maramot pynbha ia ka Dam bad la leh ia kane ka kam maramot na ka bynta ka jingshngain jong ka Dam ban pynduna ia ka jinglait jong ka um. Ngi lah pynlang ia ka um da kaba pyrkhat ba ka lah ban don ka jingduna ka um ha ki samoi kiba tyrkhong um bad ngi la pyrkhat ruh ba ka lah ban don ka jingduna ha ka jingpynmih ia ka bording” ong u Mondal bad ka bynrap, “Kumta haba ngi lah buh ia ka um bad lada slap, ia ka um la hap ban pyllait kai noh bad ban plie mardor iaka khyrdop ban lait ka um.

Mynta ngi lah pynmih ia ka bording katkum ka jingdonkam ka jong ngi, hynrei lada ngi pyllait kai noh ia ka um kaba tam ruh ngin ym ioh jingmyntoi eiei bad kam don jingeh ne jingma eiei ban pynmih shuh shuh ia ka bording bad ban die noh sha kiwei pat bad na kane hi ngin ioh pat ban thied kylla ia ka bording hadien habud”.Ula ong, ba ka jingiadie iathied ia ka bording kadei kaba la leh ha ka lytni kaba khuid ba suba lyngba ka Indian Energy Exchange, kumta ym donkam ban khuslai eiei namar lada jur u slap ka um kan kiew kynsan bad yn hap ban shu pyllait kai noh ia ka um, hynrei lada ki pynmih noh ia ka bording elektrik kan long ka jingmyntoi ia ka MePDCL bad ha ki por ban wan kan long ka jingiarap kylla ba kin ioh thied kylla ia ka bording elektrik na kiwei pat.  

U Mondal ula ong, ba namar ba kala don ka jingpahuh ka um hapoh ka dam kumta kila shimkabu ban pynmih ia ka bording ban die sha kiwei pat bad da katei ka juh ka pisa hi kaba ki ioh kin ioh ban pyndonkam ha kaban thied iaka bording ha ba ka jylla ka shem jingeh ha kaban pynmih bun ia ka bording elektrik.