Lada ym myntoi ki trai Jylla Pyndam noh ia ka Meghalaya State Investment Promotion & Facilitation Act: KSU

Ka Khasi Student Unions (KSU) hynne ka sngi ka dawa na ka Sorkar Jylla ban pynshai halor ka Meghalaya State Investment Promotion & Facilitation Act 2024, da kaba kdew ba kane ka Act kan ym lah ban wanrah jingmyntoi ia ki trai Jylla. Haba kren sha ki lad pathai khubor u General Secretary ka KSU u samla Donald V Thabah u la ong ba ka Sorkar Jylla ka la pynkylla ïa ka aiñ Meghalaya State Investment Promotion & Facilitation Act 2024, kaba ai bor ia ka Investment Meghalaya Agency (IMA) ban thied jaka bad ban aiwai pat sha ki nongbei tyngka ne ki kompeni ki bym shai, la ki dei kiba nabar ka Jylla ne kiba napoh ka Jylla. “Kaba ngi lah ban sngewthuh hangne ka long ba kum kane ka jingpynkylla kam iahap satia namar kane ka long pyrshah ia ka Meghalaya Land Transfer Act kaba iada ia ka hok long trai ia ka khyndew ka shyiap ka Jylla” la ong u samla Donald.

U Samla Donald ula ong, ba ka ain IMA ka plie lad ban thied jaka bad aiti noh sha ki riew shimet khlem da pan jingmut na ki bor Hima, ki bor shnong wat ki bor ka District Council wat la ka Meghalaya ha hap hapoh ka khyrnit ba hynriew. U la bynrap ka KSU ka sngew kane ka jingpynkylla ka long kaba ktah ia ka bha ka miat jong ki trai ri trai muluk jong ka jylla Meghalaya. “Lada ka kompeni shimet ka wan na shabar Jylla ka la sdang ban bei tyngka ha ka jylla jong ngi, mano ban ioh jingmyntoi namar ka Meghalaya kam don ia ka Policy kaba pynthikna ba ki samla jong ngi kiba khlem kam khlem jam kin ioh kam ha kum kine ki kompeni shimet” u la ong. U Nongialam ka KSU ula kam ba kiwei ki Jylla kum ka Haryana, Andhra Pradesh, Maharashtra bad Jharkhand ki don ia ka Policy, kaba kren shai ba ki company shimet ki dei ban bhah kyrpang lypa 75% ban ai kam ia ki trai Jylla.

“Nalor kane ka jingpynkylla ka pynkup bor bor ia ka IMA ka long kaba shyrkhei tam namar ba ka lah ban knieh ia kano kano ka jaka khlem ka jingmynjur jong kano kano ka tnat bad kaba kham sniew shuh shuh ka long ba la kdew shai ha kane ka ain ba ym lah ban ujor eiei pyrshah ia kane ka Agency” u la ong. Halor kane KSU ka phah ka kyrwoh kaba shai sha ka Sorkar Jylla ba ka dei ban pynshai halor kane bad lada ka Sorkar kam lah ban pynshai, ka seng kan iaid shakhmat ban dawa ban pyndam noh ia kane ka ain.