U Myntri Rangbah ka jylla u Conrad K Sangma hynne ka sngi ula pynpaw ba ka sorkar pdeng ka la phah pynphai noh ia ka T.300 Klur na bynta ban thied jaka ban pyntreikam ia ka projek rel ha ka jylla bad ka lah ban pynduh noh ar tylli ki projek rel ha ka jylla. Ka Sorkar Pdeng ka lah ban pynduh noh artylli ki Railway Project ba kynthup ia ka 22 Km Tetelia-Byrnihat bad ka 108 Km Byrnihat-Shillong namar ka jingpyrshah jur jong kiba bun balang. Haba iakren bad ki nongthoh khubor u Conrad Sangma ula ong, “Ka mat ka long ba ka sorkar pdeng kam lah ban ap baroh shirta. Ngi la ioh pdiang ia ka shithi na ka sorkar India ban pynphai noh ia ka pisa ba la phah na ka bynta ka lynti rel ha Byrnihat bad Shillong. Kumta ia kine ki projek yn sa khang khyrdep noh. Ngam tharai ba kan don ka jingurlong ban ioh ia ka rel ha Shillong namar ba ka sorkar India ka la pan noh ia ka pisa bad lada ka don ka jingioh jingkyrshan kaba wan na ka East Jaintia Hills kumta ngi lah ban iaid shakhmat bad ka projek hangtei. Ngi dang khmih bniah ruh lada ki don kino kino ki bynta ha ka jylla ia kaba ngin lah ban pyniasoh da ka lynti rel hynrei ka dei pat ban don ia ka jingmynjur lang jong baroh bad ngin sa iaid shakhmat”.
U Myntri Rangbah ula ong, kaba kham kongsan ka dei ka jingbhah ia ka jingtei ia ka lynti rel ia kaba ka sorkar kan ioh ia ka GST bad kiwei kiwei ki khajna kaba lah ban kot sha ka T.10,000 Klur. Ula iathuh ka jingtyrwa bathymmai ka dei ban pynpoi ia ka lynti rel haduh Khliehriat, East Jaintia Hills bad ka sorkar ka dang khmih bniah bha ia kane bad ka dang iakren ruh bad kiba bun balang. “Ngin iaid shakhmat lyngba ka jingkyrshan kaba ngi ioh na ki paidbah ha kaba ia dei bad kane ka bynta, namar ka dei na ka bynta ki paidbah ba kin ioh jingmyntoi, ngi khmih lynti ba ki paidbah kin sngewthuh ba ngi iaid shaphrang. Ka jingpyniasoh ha ka leit ka wan ka long kaba kongsan bha ha kane ka pyrthei mynta. Ngi lah pyrshang ban pynsngewthuh ia baroh.
Hooid, ki la don katto katne ki kynhun ba la don la ka nongrim bad ngi burom ruh ia ka nongrim ba ki ieng” la ong u Myntri Rangbah bad bynrap ba ka sorkar jylla ka don ia ka jingthmu ban pynlong ia ka jingialang paidbah halor kane ka mat.Haba kylli la ka sorkar ka don jingthmu ban pyniar ia ka lynti rel ha rilum Garo, u Myntri Rangbah ula ong, “Ngi lah ban peit ia kane, hynrei tang lada ngi lah pat ban ioh ia ka jingmynjur na ki liang baroh ”.