Lah ban sei ka Congress ïa u Manuel Badwar ban ïakhun ilekshon MP shiteng samoi

U President ka Meghalaya Pradesh Congress Committee (MPCC) u bah Vincent Pala ula pynpaw ba u kwah ban sei ia u bah Manuel Badwar kum u kyrtong ban iakhun ia ka ilekshon MP shiteng samoi na Shillong Parliamentary.Haba kren sha ki lad pathai khubor, u bah Pala ula ong ba haduh mynta ka party kam pat shym don ka jingiakren halor kane namar ba dang shu khlad shen u Dr. Ricky Syngkon.“Ngim pat don kano kano ka jingiakren ha ka party halor ka ilekshon shiteng samoi, hynrei nga la shu don ka jingiakren bad ki katto katne ki nongialam kiba la pynpaw ba lada ka party ka lah ban sei ia u kyrtong ba dang samla bad bun kiba la tyrwa ia ka kyrteng u bah Manuel Badwar,” ula ong.

Katkum ka jingong u bah Pala, bun kiba ai jingmut ba ki kwah ia u bah Manuel Badwar ban iakhun, hynrei la iohi kumba u bah Manuel um kwah ban iakhun ia mynta bad bynrap ba lada ym don ba treh ban iakhun, un iakhun hi noh ma u.“Lada ym don mano mano ban iakhun, ngan hap iakhun hi manga bad lada long kumno kumno ruh ka party kan pynieng beit ia u kyrtong,” ong u bah Pala bad bynrap kum u President ka party, u kwah ban pynleit jingmut khambha ha ka sain pyrthei jylla.

Lah ban kdew ba ka ilekshon MP shiteng samoi sha Shillong Parliamentary la hap ban pyllong, hadien ka jingkhlad syndet noh jong u  Dr Ricky Syngkon na ka party VPP. Kum ban shu kdew na ka liang ka VPP ka la tyrwa ia ka kyrteng jong u Dr. Batskhem Myrboh kum u kyrtong ban iakhun ia kane ka ilekshon shiteng samaoi,  katba kiwei ki party kim pat shym la lah ban shim rai halor kane.