Lah ban shah pynduh tiket u kyrtong ka VPP na Nongstoin

U kyrtong MDC ka Voice of the People’s Party na Nongstoin u bah Marbiang Nongsiej u lah ban shah pynduh tiket ha ka seng ka VPP. U bah Marbiang Nongsiej u dei uwei na ki kyrtong ba ka VPP ka la pynbna ha kine ki khyndiat sngi ba la dep. Ha kine ki khyndiat sngi, ka la don ka jingiakren sharum shaneng ba ka Voice of the People’s Party ka don jingthmu ban pynduh noh ia ka Tiket kaba ka la dep ai na Nongstoin sha u bah Marbiang bad kane ka jingiakren ka la nang thnem shuh shuh hadien ba ki don tang saw ngut ki kyrtong na Thain West bad Eastern West Khasi Hills kiba ka VPP ka la pynithuh paidbah ha ka jingialang ha ka 20 tarik u Nohprah 2024 ha Mairang.

Ki kyrtong kiba la pynithuh paidbah ha kane ka sngi ki kynthup ia u bah John Jeffrey Basaiawmoit na Mairang – Nongkhlaw konstitwensi, u bah Powell Sohklet na Pariong-Mawthadraishan konstitwensi, u bah Birbor Riangtem na Mawshynrut konstitwensi bad u bah Boniroy L. Lyngkhoi na Rambrai -Jyrngam konstitwensi hynrei u kyrtong na Nongstoin um don ha kane ka jingpynithuh. Kumta hadien ba la wai ka jingialang, u nonglum khubor ula ia kren lyngba ka phone bad u Chairman ka State Election Committee ka VPP u Dr. Kara Chen bad ha kane ka jingiakren bad u Dr.Kara Chen um shym la kren shai ia kane ka mat hynrei u shu ong ba ki kam ki dang don hapdeng ka jingiapynbeit.

Ha ka jingkren u President ka VPP, u bah Ardent Miller Basaiawmoit ha ka jingialang ha Mairang, la sngewthuh ba nalor ka Nongstoin ruh ki lah ban dang don sa katto katne tylli ki konstitwensi ba ka seng ka dang hap ban iakren pynbeit bha wat la ki la pynbna ka kyrteng ki kyrtong MDC.