lak ioh lum khajna ka Council na 16 tylli khyrdop

U Executive Member ba khmih ia ka tnad Revenue ka Council, u bah Winston Tony Lyngdoh ula pyntip ba ki don 16 tylli ki khyrdop khrong khajna ne ki Toll Gate kiba hap hapoh u pud u sam jong ka Council. Ia kane ula pyntip ha ka kynta kylli jingkylli ba la wanrah da u MDC ka Rambrai Jyrngam u bah L Kharbani hynne ka sngi ha ka Dorbar Mang tyngka ka KHADC. U bah Tony ula ong ba na ki 16 tylli ki khyrdop Toll Gate, ka Council ka la ioh lum khajna T.26.25 lak ha u snem 2024-25. U la pyntip ba kine ki 16 tylli ki Toll Gate ki don ha thain  Umsiang, Ri bhoi District, Umlangmar Nongspung Syiemship, Lumdiengngan, Ri Bhoi, Athiabari, West Khasi Hills, Nongshram West khasi , Umiam Industrial Area Ri bhoi, Majai East Khasi Hills, Mawlai Mawiong, Nargoan Byrnihat, Patharkhmah, Mawkhanu, Mawpdang, Cheragaon,Umsohphie, Borsohra.

Katkum ka jingiathuh u EM ula pyntip ruh ba ki don 7 ngut kiba la kut ka por shim wai kan kut mynta u bnai Lber, 2025 bad kiba dang sah ki dei kiba la dep pynthymmai, hynrei na ka liang ka EC kan sa shong ban pyrkhat ban leh kumno halor kitei kiba la dep pynthymmai. “Ka EC kan sa shong pyrkhat ban leh kumno ia kine ki 7 ngut kiba la kut ka por shim wai jong ki. Ngin sa ai ka jingthoh sha kine ki 7 ngut,” ong u bah Tony. Ula ong ba kine ki Toll Gate kine kidei ki khyrdop ba rung ki kali kit tiar bad ki kali ba kit ia ki mar ri jingri bad na kawei ka kali rit la shim T.100, kali heh la shim T.500.

U Nongialam ka liang pyrshah ha Council u bah Titosster ula buh jingkylli, la ka EC ka don jingthmu ban pynduna ia ka jingdon ki khyrdop lum khajna bad ula ai jingmut ia ka EC ba kadei ban da buh ia ka dor ba tikna khnang ban nym don ka jingshah kynnoh. Halor kane, u EM ula pyntikna ba ka EC kan sa shimkhia halor kane ka bynta.