Lap ka Assembly Committee on Environment ba jot ka mariang bad jaboh ka lyer na ki karkhana dewbilat ha Jaintia

Ka Committee on Environment jong ka Meghalaya Legislative Assembly ka Jylla hapoh ka jingïalam u Chairperson bah Wailadmiki Shylla mynta ka sngi ka la leit jurip ïa ki Cement Plant bad kawei ka Coke Plant ha East Jaiñtia Hills District ban ïa ka jingktah ka mariang na ka jingdon ki karkhana. Ki Dkhot ka Committee ba kynthup ia u Bah Mayralborn Syiem, MLA Nongpoh, bah Sosthenes Sohtun MLA Jirang bad ka kong Santa Mary Shylla MLA ryngkat kiwei ki dkhot kynthup u CP Marak IFS (Retd.), Dr.W. Ryngkhlem, ki ophisar ka district bad Meghalaya Assembly. Shwa ban jurip la pynlong ia ka jingialang ha Khliehriat Circuit House, hadien ki leit jurip ia ka Jaintia Coke Pvt. Ltd ha Shiehruphi, ka Dalmia Cement Bharat Limited ha Thangskai bad ka Star Cement ha Lumshnong baroh ki don ha East Jaintia Hills. Ha ka jingleit jurip ia ka Star Cement, Lumshnong, u bah Wailadmiki Shylla ula ban ka komiti kan pynthikna ba ki karkhana kim dei ban pynjot ia ka mariang. “Kum ki nongshong shnong bad ki dkhot ka Komiti halor ka mariang, ngi donkam ban pynthikna ba ka jingpynneh pynsah ïa ka mariang bad ki kam khaii pateng kin ïaid ryngkat ryngkat,” ula kynthoh.”Ngi don ka jingkitkhlieh ban pynneh ia ka mariang na bynta ka lawei ba phyrnai ha ki pateng ban wan,” u la ong, da kaba pynpaw ia ka jingdonkam jong ka roi ka par kaba neh ha ka thain.U Bah Shylla ula khot ia ka tnad ba ai ka thup ba bniah ia baroh ki kharkhasa sain dewiong ne coke plant ha Jaintia Hills, kiba trei beain kiba bym long be-ain. Ula pan ki jingtip shaphang ki mar ba la pyndonkam da kine ki karkhana. U la pan ruh ia ka thup kyrteng ki jaka tih maw ha baroh ar tylli ki thain East bad West Jaintia Hills, kynthup ki jaka tih mawshun bad jaka tiehmaw thup.  “Nga pan ruh ka kaiphod ka jinglong ka mariang na ka bynta u bnai Nohprah, namar ba ki jingtip ba la ai sha ka komiti haduh mynta ki kynthup tang khyndiat bnai, kiba dei ha ka por lyiur,” u la bynrap.

U Bah Shylla ula pynpaw ka jingdonkam ka jingshngain ki nongtrei bad ka jingpynrung kam ia ki briew ka thain ha ki karkhana shna dewbilat. “Nga kyrpad ki trai karkhana dewbilat kin buh hakhmat eh ia ka koit ka khiah jong ki nongtrei. Ban pynbiang ia ki tiar iada bad ban peit bniah ia ka koit ka khiah man ka por. Kum u nongshong shnong, nga kyrpad dei ban ai kam kham bun ia ki trai shnong ha kine ki karkhana. Ki don bun ki samla kiba don ia ka kyrdan pule ha ka kam shna dawai, ka kam shna ïing, bad kiwei kiwei ki jait kam, kumta ki trai karkhana ki dei ban ai kam ia ki samla don sap ha ka thaiñ,” u la ong. Ha kajuh ka por, u bah Mayralborn Syiem ula pynpaw ïa ka jingkitkhlieh ka komiti ban peit ïa ki kam ba ïa dei bad ka mariang bad ki karkhana bad ki unit ba don ha ka thaiñ, ban pynthikna ba kin ym buh jingma ïa ki paidbah. U la kubur ka jingdon ki karkhana ka iarap ha ka roi ka par ka jylla bad hynrei kim dei ban buh jingma ia ki paidbah ka thain. U la pynpaw ka jingsngewkhia halor ka jingjaboh ka lyer, bad donkam ban buddien ba man ka por bad ula pan ia ki kaiphod bathymmai na ka Meghalaya State Pollution Control Board. Ula ban jur ia ka jingdonkam ban don ki rukom synreit um ba man ka por bad ka jingthung dieng man ka por, ym tang ha ka sngi pynneh pynsah mariang ha ka pyrthei, ban pynthikna ba ki dieng kiba la thung kin dang roi. Katba u bah Sosthenes Sohtun ula pynpaw ia ka jingsngewnguh ia ki kompeni kiba la noh synniang sha ka ioh kam ioh jam ha ka jylla hynrei ula ban jur ia ka jingdonkam ban don ka jingkitkhlieh kaba kham khraw ia ka mariang. U ong ban pyndonkam ia ki jingthmu jong ka CSR ban kyntiew na bynta ban pynneh pynsah ia ka mariang.

Ula pynpaw ruh ka jingsngewkhia halor ki rukom tih maw, khamtam ia ka jingtih mawshun bad ula kyntu ia ki tnad ban thaw ia ki kyndon ban iada na ka jingktah ia ka mariang. Ula ai jingmut ban pyntreikam ia ki kyndon na ka bynta ka jingtihmaw kaba neh. Nalor kata, u pynpaw ban shimkhia ban pynbha ïa ki lad jingïada ïa ka jingjaboh bad ban pyniar ïa ki rukom peitngor ia kiwei ki karkhana bad ki karkhana ha ka jylla. Na ka liang ka Kong Santa Mary Shylla ka la pynpaw ia ki jingeh bad kyntu ia ki kompeni ba kin shimkhia bha ia ka jingpynbha ia ka mariang. “Kane ka dei ka jingpynkynmaw ia ngi, khamtam ha kaba ia dei bad ka mariang. Nga kwah ban kyrpad ia baroh ki kompeni bad ki nongtih mawshun kiba rit ba kin thung dieng ha ki jaka ba ki la tih. Ngi dei ban siew bai lutksan ia ka mariang bad ka imlang sahlang. Lada ngi pom ia ki dieng, ngi dei ruh ban thung thymmai ban pynneh ia ka mariang,” ka la ong.