Lap ka FKJGP ba duna ki lad jingai sumar ha Civil Nongstoiñ

Ka FKJGP Nongstoin circle mynta ka sngi ka 20 tarik u Kyllalyngkot 2025 hapoh ka jingialam u bah Brostar Tyrsa, General secretary bad bah Ananstar Peinlang, Vice President ki la leit ban jurip iaka Nongstoin Civil Hospital halor ka jingioh jingtip ia ka jingbym biang ki lad ai jingsumar ha katei ka jaka kynthup naduh ki tiar test bad ki doktor. Ha katei ka jongleit jurip, watla ka Seng Kam shym la ioh ban iakynduh ia u Medical Superintendent namar ba um don hapoh Hospital hynrei ka la iohlad pat ban iakynduh ia u doktor ba dei peit bad ha ka jingjurip bad twad jingmut, ka Seng ka la lap ia shibun ki jingbym bit bym biang ha katei ka jaka sumar ba kynthup ia ka jingduna ki kali kit nongpang ne ambulance, ka jingbym don ka kali kit met iap (mortuary van), ka jing bym don ki doctor specialist ban leh iaka ultrasound, ka jingkhapngiah ki kamra thiah naka bynta ki longkmie kiba armet bad kiba la dep kha khyllung ha kaba ki la hap ban thiah wat habar ki ward,  Ka jingduna ki tiar test, Ka jingbym don ki doctor khmat bad ka jingbym biang ki dawai dashin bad ha kaba ha kiba bun ki khep, ki nongpang ki hap ban leit theid hi na shabar.

Ha kajuh ka por ka Seng ka la lap ruh ba ka kamra OPD ka long kaba khapngiah haduh katta katta bad katkum ka jinglap jong ka seng ka don tang kawei ka kamra ban leh iaka routine check up. Ka Seng ka la pynpaw ruh ba kumba long mynta la i donkam kyrkieh  ban plie noh iaka Intensive Care Unit (ICU) khnang ba yn lah ban sumar khamkloi ia kito kiba la kham jur ka jingshitom. Ka Seng ka la ai jingmut ruh ia ka tnad ka koit ka khiah ban kham pynbun ia ki nongtrei khnang ba yn lah ban ai ka jingshakri kaba khambha ia ki paidbah.Namarkata, ka seng ka kyntu iaki bor ba dei peit ba kin phaikhmat bad shimkhia ban pynbit pynbiang ia ki jingdonkam jong ki paidbah ka dong ka thain bad ka la pynthikna ruh ba kan sa leit mih sha ki bor ba dei peit iaka tnad ka koit ka khiah ban iai bud dien naka bynta ka jingbha jongki paidbah ka thaiñ.