Lap ka tnad Excise ka jaka shna kiad beaiñ ha Nongsder, kurup bun ki tiar

Hadien ba la ioh ka jingioh ba tikna ba don ki ktem shna kiad beain ha Ri Bhoi District, na ka liang ka tnad Excise Ri Bhoi District, ki la leit ban khynra syndet ia kitei ki ktem shna kiad beain kynthup ha Umiam Industrial Complex bad ha Shillong Bypass hajan ka shnong Nongsder. Kumba la pyntip ba ia kane ka jingleit khynra syndet ia kitei ki ktem shna kiad beain, ka dei ruh hadien ka jingioh kem ia kawei ka trok ba palat 3000 ki bitor kiad ba don u number AS 11 AC 9144 ha Khanapara da ki bor ka Excise na Assam bad ha ka jingtohkit la ioh jingtip ha kaba ia dei bad ka jingdon kitei ki ktem shna kiad beain ha Ri Bhoi District. Haba kren bad ki Nongthoh Khubor, u Bah RC Lyngdoh, Superintendent of Excise ka Ri Bhoi District, ula iathuh ba hadien ba la ioh ka jingbthah na u Commissioner of Excise ha kaba ia dei bad ka jingtip ba la ioh lum halor ka jingdon ki ktem shna kiad beain, kumta na ka liang kane ka tnad ki la leit ban khynra ia kitei ki jaka ha ka 2 tarik Lber (Sngi u Blei).

Ula iathuh ruh, ba ha kane ka jingleit khynra ba nyngkong ba la pynlong ha Umiam Industrial Area, ym shym la ioh satia ia kino kino ki tiar hynrei ha ka jingkhynra ia kawei pat ka jaka ba la suba jur ban don ka jingshna kiad beain ha u surok Shillong Bypass hajan ka shnong Nongsder ha ka jingiadonlang ki pulit na Umiam, la lap ia ka jaka shna kiad beaiñ bad ioh ban kurup ia shibun tylli ki tiar kum ki Blending tags, storage tank, capping machine, production lines, ki flavouring bad colouring agents bad ruh kata ka hologram thok jong ka jylla Assam bad Meghalaya bad ruh kumba 23000 bilor ka kiad ba la dep sain ba tah kyrteng kum ka OC, OC Blue, Royal Stag bad McDowell’s No.1.

Shuh shuh u Bah Lyngdoh ula ong ba watla ha kane ka jingkhynra ym shym la ioh ban kem iano iano ruh namar ba ym don briew ha katei ka jaka, hynrei na ka liang ka tnad Excise kan nang pynlong ia ka jingtohkit ban lap ia ki trai jong katei ka jaka bad ban pynngat ruh ia ki katkum ka kyndon ain ban ujor sha ka iingkashari jong ka District and Session Court Nongpoh.