Lap mrad Slowloris na ka trok, leit ai ka shnong Umsawnongkharai sha Wildlife

Ki nongshong shnong ka Umsawnongkharai ki la ioh ban pynlait im bad ban aiti noh ia u wei u mrad ba la tip kyrteng kum u Bangsoh lane Slowloris ha ka ktien nongwei, ia u ne u mrad u ba la poi wir namar bym don jaka rieh tngen la lap nyngkong napoh ka trok kaba ieng harud surok bah NH-06 da ki nongñiah trok. Na ka liang u Bah Tony Shylla, Secretary ka Dorbar Shnong Umsawnongkharai, ula iathuh katto katne ngut ki nongñiah trok ki la pyntip ba don uwei u mrad ba la rung hapoh kawei ka trok kaba ki pynieng harud u surok bah NH-06, kumta ma u lem bad ki samla shnong ki la leit jurip bad lap shisha ia u ne u mrad Bangsoh u ba la riehtngen hapoh kawei ka trok.

La iathuh ruh, ba la shimti ia u tei u mrad bad sumar ia u ha shwa ban aiti noh mynta ka sngi sha ka tnad Wildlife ban pynlait im pat ia u sha ki khlaw kiba pajih na ki Shnong briew ban lait na ki riew shim kabu.

Shuh shuh ruh, la iathuh, ba ka jingphet wir ki mrad khlaw la suba jur ba ka lah ban dei namar ka jingjur ka jingthang khlaw pathar da ki briew ha kaba ki bunjait ki mrad ki la duh noh ia la ki jaka riehtngen kaba la pynlong ia ki ban poi wir wat sha ki Shnong ki thaw, kumta la kyrpad ia ki paidbah ban kiar na ka jingthang khlaw kaba lah ban pynduh jait ia ki mrad ki mreng bad wat ia ki jaka riehtngen jong ki.