Leit iakynduh ki EM ka KHADC ia ka Myntri Pla Tyngka ka ri

Ka Executive Committee jongka Khasi Hills Autonomous District Council (KHADC) hynne ka sngi, kila iakynduh ia ka Myntri ka tnad pla tyngka ka sorkar India ka Nirmala Sitharaman ha New Delhi, ban kyntu ban pyllait pisa noh ia ka pisa ba sah na ka 15th Finance Commission.Ki EM kiba kynthup ia u Bah Powell Sohklet ba khmih ia ka tnad Development, u Bah Seiborlang Warbah uba khmih ia ka tnad Finance bad u bah Mathew Makdoh u MDC ba shu siej, nalor ki ophisar ka KHADC, kila pynsngew halor ka jingdonkam ka Council ia ka song pisa iarap na ka sorkar ne ka Special Package.

U bah Powell ula ong ba ka jingleit iakynduh ia ka Myntri ka long na bynta ban kyntu ban pyllait noh ia ka pisa ba sah jong ka 2nd Installment na ka 15th Finance Commission bad ban kyntu ruh ban ai song pisa iarap sha ka Council.Katkum ka jingong u bah Powell ka jingiakynduh ka long kaba seisoh bad na ka liang ka Myntri kala shah skhor ia ki jingkyntu jongki bad kala kular ruh ban iarap ban pyllait ia ka pisa bad kala bthah ruh ia ki, ba kin pyndonkam ia ka portal ka tnad na bynta ban pyniaid ia ki skhim.

“Ngi don ka jingkyrmen ba na ka liang ka tnad Pla tyngka ka sorkar India ha shwa ban kut ka 15 Finance Commission, kan pyllait shwa ia ka 2nd Installment jong u snem 2021-22,” ong u bah Powell.Halor ka song iarap pisa kaba kyrpang na bynta ka Council, u bah Powell ula ong ba na ka liang ka Myntri ka la shah skhor bad ka la bthah iaki ba kin pynkhreh ia ki projek ki skhim bad ban aiti sha ka tnad ka sorkar India.