Leit iakynduh u Conrad bad Prestone ïa u Lat, ban batai shaphang ka jinglong jingman ha rilum Garo

U Myntri Rangbah ka Jylla u Conrad K Sangma hynne ka sngi ula pyntip ba ka Sorkar kala shimkhia ban wanrah biang iaka shongsuk shongshngain hapoh ka rilum Garo.Ia kane u Myntri Rangbah ula pyntip hadien ka jingwan kynduh ia u Lat ka Jylla u CH Vijayashankar ha ka jingsynranlang u Symbud Myntri Rangbah ba khmih iaka tnad kam pohiing (Police) u Bah Prestone Tynsong.Haba kren sha ki lad pathai khubor u Conrad ula iathuh ba ka jingwan kynduh ia u Lat ka Jylla, kadei kum shi bynta ban pyntip haba iadei bad ka jinglong jingman hapoh Garo Hills hadien bala mih ka jingiakynad namar ka jingpyrshah ia ki bym dei jaidbynriew riewlum ban iashimbynta ha ka Elekshon MDC sha Garo Hills Autonomous District Council (GHADC).

U Conrad ula ong, ba naduh ba sdang ka jingiakynad ula don beit ha Garo Hills ha kine ki artaiew kiba la dep bad ha kine ki por u ioh ban iakren bad u Lat ka Jylla tang na ka Phone. “Namar kata nga sngewdei ban iakynduh markhmat bad u Lat ka Jylla ban iasyllok haba iadei bad ka jingjia ha Garo Hills. Ha ka jingdonlang u Symbud Myntri Rangbah ba khmih iaka tnad kam pohiing (Police) nga la pyntip lut nadong shadong ha u Lat ka Jylla haba iadei bad ka jingjia ha Garo Hills” la ong u Conrad.U Conrad ula pyntip ba ka Sorkar kala aiti ha ka tnat Pulit ban leh ia kaba donkam ban tem iaka jingiakynad ne kem ia kino kino kiba donkti ban pynshit ban wanrah iaka jingsngewpher jaidbynriew hapoh ka thaiñ.”Namar kata katkum ki sakhi sabut, katkum ki ain ki kanun, ki Pulit kin leh iaka ba donkam. Ngam tip, katno ngut ka shah kem, mano ba shah kem, u Superintendent of Police un kham tip kham bha halor kane” ula ong.

U Myntri Rangbah ula pyntip ruh ba ka jinglong jingman mynta hapoh rilum Garo kala kham biang hynrei ki dang don katto katne ki jingjia ha ki katto katne ki jaka.”Ka jingiakynad kala duna. Na ka liang ki bor district bad ki Pulit ki peitngor bha ban pynthikna ba ka shongsuk shongsain kan wanphai biang. Ha bun bynta ka shongsuk shongsain kala wanphai, ki briew kila leit phai biang shala ki kam ba man ka sngi bad hadien bala bishar bniah ngi la weng noh iaka jingkhang iaka Mobile Internet. Kane baroh ka pyni ba ka shongsuk shongsain kala wanphai biang hynrei ngin iai long pat kiba peitngor” la pynkut u Myntri Rangbah.