Leit jngoh ka CRI bad ki samla pule ïaka Mercy Home

Ha ka 27 tarik mynta u bnai ki dkhot ka Conference of Religious India (CRI), Shillong unit, kiba mihkhmat ïa ki kynhun niam bapher bapher ki la leit ban jngoh ïa ka ri sumar iaki riew tymmen lane ka Mercy Home kaba don ha nongbah Shillong. Kane ka jingleit jngoh ka CRI kadei ruh ban rakhe ïa ka sngi kyrpang jong ki riew tymmen ki kro bad ki bad ruh ban rakhe ia ka snem Jubili 2025 da kaba pynksan ia ka jingsngewnguh bad burom ia ka jingstad bad burom jong ki riew tymmen. Ïa kane ka prokram la pynïaid da u Sr. Chiruplang Swer SCCG na ka St Edmund’s College Laudato Si’ Society bad ha kane ka sngi la don ruh ka jingiarwai, jingduwai haka ktien Khasi, English bad Hindi ban ai mynsiem iaki riew tymmen bad ki kro.

Ha kane ka sngi la wan shim bynta lang da u ki khynnah shynrang jong ka Stephen Hall boys, Auxilium pre-aspirants bad Loreto Hostel girls. Naka liang u President ka CRI u Br. Sunil Britto CFC u la ai jingkren sha ki riew tymmen da ki kyntien pyntngen bad ai mynsiem: “Ngi tip ba teng teng ka jinglong marwei bad ka jingtlot ha ka met ka lah ban ktah ia ki dohnud jong phi, hynrei sngewbha kynmaw ba la ieit eh ia phi da U Blei bad da ngi baroh kiba don hangne. Ki jingiathuhkhana jong phi, ka jingngeit jong phi, bad ki jingduwai jong phi ki long ka pateng kaba ai mynsiem kaba pynshai ia ka lynti na ka bynta ki pateng kiba dang rit.”

Ka jingshem kaba bha jong baroh ka la pynskhem ia ka jingdonkam ban khein kor bad sumar ia ki tymmen kum ka tyllong kaba kongsan jong ka jingngeit bad jingstad hapoh ka imlang sahlang, kaba pynpaw janai bha ia ka mynsiem jong ka jingkyrmen, jingiatylli bad jingsumar jong ka Snem Jubili.