Leit jurip u Myntri ia ki jingtei ha Kupli Orchid Resort

U Myntri ka Tnad Jngohkai u Bah Paul Lyngdoh ha ka sngi Saitjain ula leit jngoh ia ka Kupli Orchid Resort ha shnong Priang, West Jaintia Hills ban peit ia ki jingtei ba ia dei bad ka kam jngohkai. Ha katei ka jingjurip la synran da u MLA ka thain u Bah Nujorki Sungoh bad ka Director ka tnad Tourism ka Kong Brenda L. Pakyntein ryngkat bad kiwei kiwei ki ophisar. Ha kane ka sngi u Myntri Sorkar ula shong da ka lieng ban peit ia ka jinglong jingman bad ban kyntiew ia ki kam jngohkai kiba don ha ki jaka kiba itynnad jong ka Wah Kupli bad ula pynlut ruh ia ka por ban iakren bad ki nongshong shnong katei ka thain.

Ha ka jingialang kaba la long hapoh ka Resort, ka kynhun jongka Synjuk Ki Waheh Shnong Iooski-Saphai Circle kala aiti ia ka dorkhas ban kyntu ia ka sorkar jylla ban wad ia ki lad ki lynti ban kyntiew ia ki kam jngohkai ha ki 13 tylli ki shnong kiba don ha ka thain jongka Chutwakhu–Saphai bad kila daw aba dei ban tuklar mardor na ka bynta ban kyntiew ia ka roi ka par. Kila tyrwa ba kitei ki shnong dei ban pynbna noh kum ki jaka jngohkai kiba kyrpang.Ki la kyntu ruh ia ka sorkar jylla ban kynthup ia kitei ki shnong hapoh u pud u sam jongka jingkhmih jong ka tnad khnang ba ki nongshong shnong kin ioh ia ki skhim na ka sorkar jylla, ka jingkyrshan pisa bad ban pynlong ia ki prokram ban ai jinghikai.

Ha katei ka dorkhas la kyntu ruh ban don ia ka sienjam ban pynkhuid bad ban pynkhie im biang ia ka Wah Kupli bad ban kyntiew ia ka kum ka Eco-Tourism bad ka jingpynneh pynsha ia ka mariang. Nalor kane kila tyrwa ruh ban buh ia ki kam ialehkai kiban ym ktah ia ka mariang ne ki Eco-Friendly Water Sports bad kiwei kiwei kiba iadei bad ka kam jngohkai ha shi lynter jong katei ka wah.