Leit ka kynhun ki samla na Meghalaya sha Indonesia ban iasam ia ka kolshor bad jingiatreilang

Ka kynhun ba 24 ngut ki samla na ki 12 tylli ki district ka jylla ki la mihkhmat ia ka Meghalaya ha ka International Exposure Youth Programme ha Jakarta bad Bali, Indonesia kaba sdang naduh 16 tarik haduh 22 tarik u Rymphang, 2025. Ka prokram ka long na bynta ban iamir jingmut hapdeng ki samla bad iasam ia ka kolshor bad kiwei ki Ri, halor ka jinglong nongialam ban wanrah ka jingiatreilang ha ka pyrthei. Ia ka kynhun la laweh lama ha ka 14 tarik u Rymphang, 2025 kaba la sdang ia ka jingleit hadien ba la jied na ka kynhun jong ki 600 ngut ki samla na ki 12 tylli ki distrik ka jylla. Ia kane ka kynhun la ialam da u bah Bobby Wahlang, Youth Program Coordinator, ka kong Darlene M. Khonglam, ka Sports Officer, ka Barbira Momin DSO bad ka Beltish Sangma PTI.

Ki samla ki la ïashim bynta ha ka prokram kolshor bad ïakynduhlang bad ki samla ka Ri Indonesia ha Don Bosco Institute, Jakarta ha ka 19 tarik u Rymphang kum shibynta jong ka Exchange Programme. Ka jingïalang ka long ban ïakren iathir halor ka jinglong jingim tynrai bad ban ïoh jinghikai hapdeng ki kolshor bapher bapher na bynta ban pynskhem ïa ka jingïadei hapdeng ar tylli ar tylli ki Ri. Ha ka 20 tarik Rymphang, ka kynhun ka la leit jngoh ïa ka National Museum, ka National Monument, ka Cathedral jong ka Jakarta, ka jaka ri sim, ka Space Centre bad ki karkhana rit ha Jakarta ban wad bniah ïa ki histori bad ka kolshor. Kane ka jingleit ka pynpaw pyrthei ha ki samla ia ka pateng ba riewspah jong ka Indonesia, ka jingkiew ka teknoloji bad ka jinglong jingman ki nongseng kam sengjam. Mynta ki don ha Bali, ha kaba ki la thmu ban leit jngoh ïa u lum ding Kintamani ba pawnam, ki kper sha kynbat, bad kiwei kiwei ki jingkynmaw bapher bapher jong ka ri, kaba pynjylliew shuh shuh ïa ka jingsngewthuh jong ki shaphang ki jaka bapher bapher bad ka jingriewspah jong ka kolshor jong ka Indonesia.

Ha ka sien basaw, ka jylla Meghalaya ka la ïashim bynta ha ka international prokram kaba la sdang naduh u snem 2015 ban ailad ïa ki samla pule ban ïoh ïa ka jingïakynduh ha ka Ri bad ki ri ka pyrthei. Ka International Exposure Youth Programme ka ai lad kyrpang ia ki samla na Meghalaya ban ioh ia ka jingithuh ha ka pyrthei, ban kyntiew ia ki sap nongialam bad ban pynroi ka jingiadei paralok. Ka jingshemphang ba ki ioh kan iarap shibun ia ka jingtip shimet bad kum ki nongialam jong ka Meghalaya bad ka ri na bynta ka lawei.