Ka Seng Samla Mawlai Pyllun (SSMP) da ka jingsngewkhia halor ka jingkyrduh um hapoh ka shnong Mawlai, hynne ka sngi ka la leit ia kynduh ia u Chief Engineer ka tnad PHE ban bud dien halor ka dorkhas ba ka seng la dep ban ai naduh u Iaiong mynta u snem halor ka jingkyrduh um la mad da ki paidbah ka shnong Mawlai. U President ka SSMP u Bah Samuel Biam ula ong, ka jingleit iakynduh ia u Chief Enigineer, ka long ban pynsngew ba ki shnong hapoh Mawlai ki ioh um tang arsien ha ka shitaiew katba kiwei pat ki shnong kiba shabar ka Mawlai ki ioh ia ka um man ka sngi bad kane ka la buh ha ka jingeh kaba khraw ia ki nong Mawlai namar ka jingbym ioh thikna ia ka um man la ka sngi.
Ula ong ka SSMP kala pynpaw sruh halor ka jingbym ioh ki iing hapoh Mawlai ban ring um thymmai watla ka shnong Mawlai ka dei ka shnong kaba heh bha hynrei ki nongshong shnong kim ioh ban ring um thymmai ha ki iing jongki bad kaba khatduh ka dei naduh u snem 1997 ba kila leh. Hynrei haba ki la iakren halor kane ka mat, na ka liang ka PHE kala pynpaw ba kadei na ka jingduna ka um. Kumta u President ka SSMP ula ong ba kane kam dei satia na ka jingduna um hynrei kadei na ka jingbym sam ryntih ia ka um da ka tnad sorkar. Ula ong ruh ba ki nong Mawlai kidei kiba biang tam ka rukom siew ia ka bai um wat la ki ioh tang 8 sien um ha ka shi bnai haba ianujor bad ki shnong kiba ioh pahuh ka um man la ka sngi.
U Bah Samuel ula ong ba ka SSMP kan ap ia ka tnad PHE ba kan lum ia ka jingialang bad lada jia ba kam leh eiei, kumta ka SSMP kam banse ban shim da ka sienjam kiba tyngeh. Ha ka dorkhas ka SSMP kala kyrpad ia u CE ka PHE ban ai noh da u pipeline uba kyrpang na Mawphlang sha Mawroh kaba don ka top um ban pynthikna ba yn lah ban pynbiang ia ka umbam umdih ia ki paid nongshong shnong khlem da donkam shuh ban shaniah ha kiwei pat ki pipe um kiba iaid ban pynpoi sha kiwei pat ki jaka.