Leit tur kyndit ka COMSO ha Secretariat ban dawa pyntreikam ILP

Ki sengbhalang hapoh ka lama jong ka Confederation of Meghalaya Social Organisation ne COMSO hynne ka sngi ki la leit tur sha ka Meghalaya Secretariat ban dawa pyntreikam ia ka Inner Line Permit (ILP) hapoh ka Jylla. Ki Nongialam bad ki dkhot sengbhalang  ha ka por kumba 12 baje shiteng sngi ki la rah ki jingthoh bad ki la pyrta jam ban dawa pyntreikam ia ka ILP hynrei mar mar la wan poi ki bor pyniaid district bad ki pulit ki la pahara jur ha katei ka jaka. Hadien ki heh pulit bad u Majistor ki la iakren bad ki nongialam ka COMSO bad ki la ai lad ban pynlong shipor ia ka jingiakhih ba jai jai hynrei kim shym la shah pat ia ki ban shong hapdeng surok ban pynthud ia ka leit ka wan ki paidbah.   U President ka HYC u Bah Roykupar Synrem ula ong, ka jingwan ka COMSO ban dawa ia ka ILP ka dei namar ba ka sorkar India naduh u snem 2019 haduh 2025 kam shym la ai satia ia ka jubab ban ai ne ban ym ai ia ka ILP bad ka long lehnoh ei ka jingmynjur ki 60 ngut ki MLA ba long ka sur u paid nongshong shnong ka jylla ban dawa na ka sorkar pdeng ban pyntreikam ia ka ILP ha ka jylla Meghalaya namar ka Sorkar India kam shym la burom ia ka sur jong u paidbah.

Ula bynrap ka COMSO ka sngewsih halor ka jingjia ha ki khyndiat sngi, ba u briew na shabar jylla u shah pyniap ha kiwei pat ki briew na shabar jylla bad phet pat sha la ka jylla hadiena katei ka jingjia. Kine ki jingjia kim dei tang mynta hynrei ki lah don bun ki jingjia bad ka jingshah pyniap hapoh ka jylla. “Lada dei ba ka jylla ka don ia ka ILP kine ki briew shwa ba kin leh ia kane ka kam sniew kin hap ban pyrkhat arsien namar shwa ban rung shapoh ka jylla kin hap ban ai ia ka kyrteng bad ia ka jaka sah bad shaei ki thmu ban leit bad kin sah katno sngi bad yn tip ruh la ki dang don ne ki la leit phai” la ong u President ka HYC bad ula bynrap ban la pyntreikam ia ka ILP naduh kato ka sngi lah dep ban tip ba ka Sonam bad kiwei pat ki la mih na ka jylla”.

Ula ong, ka Sorkar Pdeng ka la bthah ia ki jylla baroh ba ki dei ban thaw ia ka Special Investigation Team (SIT) man ki district ban lap bad pynphai noh ia ki briew ba la wan rung be-ain na ka ri Bangladesh bad Myanmar hynrei haduh mynta ka Sorkar Meghalaya kam pat thaw satia ia ka SIT katba kiwei ki jylla ki la iaid shakhmat. Ka COMSO ka la dawa na ka sorkar jylla ban pyntreikam noh ia ka Migrant Workers (Amendment) Bill, 2024 namar haduh mynta kam shym la pyntreikam ban tehlakam ia ki briew ba wan na kiwei ki jylla kiba wan bylla hapoh ka jylla Meghalaya.