Lum jingïalang bishar kam u Myntri Sorkar Pdeng, kular ïatreilang bad Sorkar Jylla

U Myntri ka tnat Social Justice and Empowerment ka Sorkar Pdeng u Dr Virender Kumar hynne ka sngi u la lum jingïalang bishar kam ha nongbah Shillong ban haba iadei bad ka jingpyntreikam iaki skhim bapher bapher hapoh East Khasi Hills.
Hashwa kane u Dr Virender u la leit jurip iaka Government Girls Higher Secondary School, Urban Primary Health Care Centre, Mawpat, Anganwadi Centre ha Mawdiangdiang, New Hope De-Addiction cum Counselling Centre, Mawdiangdiang, Child Care Institutions and De-Addiction Campus, Mawkasiang bad ha Old Age Home kaba don ha Demthring.
Haba kren shaki lad patahi khubor hadien ka jingïalang, u Myntri u la ïathuh ba naduh 2014, ka Sorkar Pdeng kala mang bun tylli ki skhim naka bynta ki Jylla hapoh ka thaiñ shathei lammihngi kynthup ha Meghalaya.
U la ong ba ka thong jong ka jingïalang kadei ban bishar bniah halor ka jingpyntreikam ïa ki skhim bapher bapher kum ka Pradhan Mantri Awaz Yojana, ka Pradhan Mantri Krishi Sinchai Yojana (PMKSY), ka Vatsalya Mission Yojana nalor kiwei kiwei de.
“Ha ka jingiakren jong nga bad baroh ki nongshim bynta, nga buh jingkylli shaphang ka jingpyntreikam ia ki skhim bapher bapher bad nga la buh jingthoh ia baroh ki jingai jingmut bad ki jingujor ba nga ioh na baroh ki nongshim bynta” la ong u Dr Virender.
U Dr Virender u la ïathuh ba katkum ka jingbthah jong ka tnad Development of North Eastern Region (DoNER), baroh ki Myntri Sorkar Pdeng ki hap ban leit shaki Jylla ka thain shatei lammihngi ban bishar bniah halor ka jingpyntreikam ia ki skhim bapher bapher.
“Ka thong jong ka Sorkar Pdeng ka long ban pynthikna iaka jing pyntreikam hok ia ki skhim bad lada don kino kino ki jingeh, ka Sorkar Pdeng kan shong bad ka Sorkar Jylla ban pynbeit ïa ki jingeh baroh” u la ong.
Haba kylli halor ka thma pyrshah drok, u Myntri Sorkar Pdeng u la ong “Ka jingeh ba mih na u drok kam dei tang ka jingeh jong ka Sorkar Pdeng ne ka Sorkar Jylla, ka Sorkar Jylla bad ka Sorkar Pdeng ha ryngkat bad ki paidbah ki dei ban iatreilang ban rat dyngkhong ia ka jingma jong u drok na ka imlang sahlang”.