Lum u CS iaka jingïalang ban bishar iaka jingpyntreikam iaki skhim

U Chief Secretary (CS) ka Jylla u Bah DP Wahlang hynne ka sngi u la lum jingialang ban bishar bniah iaki skhim bad ka jingpyntreikam ha ki District jong ka Rilum Garo Hills. Ia kane ka jingialang la pynlong ha Tura West Garo Hills District ha ka jingdon lang heh Ophisar na ki tnat bapher bapher jong ka Sorkar Jylla. Ha ka jingïalang u Chief Secretary u la bishar iaka jingpyntreikam iaki skhim ba kynthup ka Prime Minister Awas Yojana (Urban/Rural), National Highways & Infrastructure Development Corporation Limited (NHIDCL), Prime Minister Surya Ghar Muft Bijili Yojana, Mission Education, ka jingpynrung kyrteng Aadhar bad ka jingpyniasoh ia u Aadhar Seeding bad ki Card NFSA ration, MHIS bad ki jingtei haka tnat ka koit ka khiah, PM-SYN/ PMSBY/ PMJJBY bad ki khana jingjop namar kine ki skhim. Ha kane ka jingialang bishar kam, la pyni ia ka jingiaid shaphrang ban pyntrei iaka skhim PMAY hi District ka Rilum Garo Hills bad la ia kren ia ki jingeh jong ka geo-tagging namar ka jingbym biang ka Network, ki jingeh jong ki nongioh jingmyntoi kiba sah ha ki jaka Sorkar, ka jingpyniasoh ia u Aadhar bad kiwei ki skhim Sorkar.

La bishar ruh ia ki projek ba la pyntreikam da ka NHIDCL kaba la pyni ia ka jingkiew beit ha Tura –Dalu Road, Dainadubi –Darugre katba ka surok Baghmara sha Shillong ka la jan dep bad ka shim por tang hynriew kynta na Baghmara sha Shillong kumba la pyni da ki Ophisar ka NHIDCL. Ha kane ka jingialang u Chief Secretary u la kyntu ia baroh ki Deputy Commissioner ba kin bishar bniah ia baroh ki skhim bad ban buddien ia ka jingiaid ka jingpyntreikam ia kitei ki skhim.  Haba ia dei bad ki nongioh jingmyntoi na ka PMAY, u la ong ba ym bit ban iehnoh ia kino kino ki bym don iing don sem ha ka Jylla bad ula bthah ba ia kum kita dei ban shah kynthup ha ka skhim PMAY. Haba kdew shaphang ka lah ban pynlyngkot ka jingiaid kali na Baghmara sha Shillong, u Chief Secretary u la ong ba ki briew na ka thain Khasi Hills mynta kin ioh ia ka lad ban leit jngoh ia ka Balpakram National Park, hynrei u la ai jingmut ia ki Ophisar ka tnat Forest ban kyntiew kyrdan bad maramot ia ka Guest House ha Balpakram ban pynsah ia ki National park.

Shuh shuh, haba ïakren halor ka PM Surya Ghar Mukt Bijili Yojana, u symbud myntri rangbah u la bthah ïa ka tnad Planning ban thoh sha u CM Solar Mission na ka bynta ka convergence bad ruh ban trei tyngeh ban pynurlong ïa ka thong kaba donkam. U la kyntu ruh ïa baroh ki Deputy Commissioner jong ka thaiñ Garo Hills ba kin pynsuk ïa ka jingpynrung kyrteng Aadhar bad ka jingpyniasoh ia u Aadhar na ka bynta ban ïoh ïa ki skhim Sorkar bapher bapher. Shuh shuh u la bthah ruh ïa ki Deputy Commissioner ba kin kylli bniah halor ka prokram ba ju pynlong da ka tnad Directorate of Information and Public Relations kham mynshwa kum ka RIC (Rural Information Campaign) ban pynsngewthuh ïa ki paidbah halor ki skhim bad ki prokram jong ka Sorkar. U Chief Secretary u la kyntu ruh ia ki heh Sorkar ba kin pynpaw ia ki skhim social security bad ka jingiarap pisa ba la ai sha ki nongpang hapoh ka skhim MHIS da ka Sorkar da kaba kdew ba kine ki dei ki skhim kiba iarap shisha ia ki paidbah baduk bad kyntu ia ka tnad ban pynmih ia ki khana jong ki jingjop jong ki. Naka liang u Commissioner bad Secretary ka tnat Food Civil Supplies and Consumer Affairs, Social Welfare u Pravin Bakshi u la pynpaw halor ka jingdonkam jong ka jingpyniasoh ia u Aadhar na ka bynta ban ïoh ïa ka NFSA bad kiwei kiwei ki lad jingïarap na ka ICDS bad u la bynrap ba ka jingpynrung kyrteng ban pyniasoh ia u Aadhar hapoh ka Jylla ka dang bteng haduh 30 tarik Jylliew 2025.

U Secretary ka tnat Pule Puthi u Swapnil Tembe u la ai ruh ia ka kaiphod jingpyntreikam jong ka Mission Education hapoh ka Phase I, II bad III ha ka thain Garo Hills kynthup ia ka jingpynbha ia ki jingtei jong ki skul ha kane ka thain.U Principal Secretary, Health and Family Welfare u Sampath Kumar u la pyntip ruh halor ka jinglong jingman bad ka jingpyntreikam ia ka Meghalaya Early Child Development Mission hapoh ka Jylla.