Lyngngoh ka Demand Committee bym kwah kynduh u Dy. CM

Ka National Highway Demand Committee, South West Khasi Hills District hapoh ka jingialam jong u Bah Kynpham V. Kharlyngdoh kum u Chairman, ka la pynpaw ia ka jinglyngngoh kaba khraw halor ka jingbym jubab bad sngap mynthi jong u Deputy Chief Minister ba ka dei peit ia ka tnat PWD, u Bah Prestone Tynsong wat la kane ka kynhun ka la leit buh ‘appointment’ ban iakynduh ia u la ar sien ar wat ban iakren bad iamir jingmut halor ka jingangnud jong ki paitbah ka District mynta la da ki phew snem ban ioh ia ka surokbah National Highway naduh na Lad Mawreng – Mawkyrwat-Ranikor.

Haba kren ha ki lad pathai khubor hadien ka jingialang mynta ka sngi ha Mawkyrwat, u bah Kynpham u la iathuh ba ka kynhun la arsien arwat ka la leit buh ‘appointment’ ban rah ia kane ka mat ha u Dy. CM, hynrei kim shym la iohlad satia ban iakynduh na ka daw ba u Dy. CM um shym la ai jubab watla ki la kyrpad ruh wat ia u MLA ka Mawkyrwat, u bah Renikton L. Tongkhar bad u MLA ka Ranikor u Bah Pius Marwein ban iarap lem bad kumjuh ki la leit iakynduh ruh wat ia u Personal Assistant jong u, hynrei kam shym la seisoh satia.Kumta, kane ka NH Demand Committee mynta ka sngi ka la shim ia ka rai ban leit buh ‘appointment’ biang sa shisien, bad lada u Dy. CM um patiaw ne um kwah halor ka jingkyrpad ban iakynduh, na ka liang ka kynhun kam banse ban shim da kawei pat ka sienjam ban ioh pynsngew ia kane ka jingangnud ki paitbah ka District.  

Ha kawei pat ka liang, u Bah Kynpham u la iathuh ba ka nongrim jong kane ka National Highway Demand Committee, South West Khasi Hills District naduh kaba sdang hi ka long ban pdiang sngewbha ia baroh ki kam pynroi hapoh ka District, bad kumta kam don kano kano ka jingpyrshah halor ka jingthmu jong ka Sorkar Jylla ban bteng ban pyntrei da ka surokbah Intermediate naduh na Weiloi haduh Mawkyrwat, hynrei kumba ka surok Lad Mawreng-Mawkyrwat-Ranikor ka la ioh ia ka ‘status’ kum ka National Highway naduh u snem 2017, kumta kane ka kynhun ka kwah ba ka Sorkar kadei ban wanrah da ka surokbah National Highway khnang ba kan ai jingshakri kham bha ia ki paitbah jong ka District.